اسلام آباد(پاک ترک نیوز ) صدر آصف علی زرداری، وزیراعظم شہباز شریف، نائب وزیراعظم اسحاق ڈار اور وفاقی کابینہ کے دیگر ارکان کو رواں سال غیر ملکی شخصیات کی جانب سے ملنے والے درجنوں تحائف توشہ خانہ میں جمع کرا دیے گئے۔
وفاقی وزارتِ اطلاعات نے گزشتہ تین ماہ کے دوران وزیراعظم، نائب وزیراعظم، وفاقی وزرا اور دیگر سرکاری عہدیداروں کو ملنے والے تحائف کی تفصیلات جاری کر دی ہیں، جبکہ کابینہ ڈویژن نے بھی اپنی ویب سائٹ پر 2002 سے اب تک توشہ خانہ میں جمع کرائے گئے تحائف کا ریکارڈ اپ لوڈ کر دیا ہے۔ تاہم تحائف دینے والی غیر ملکی شخصیات کے نام ظاہر نہیں کیے گئے۔
وزیر اطلاعات عطا اللہ تارڑ نے کہا کہ حکومت باقاعدگی سے توشہ خانہ میں جمع کرائے گئے تحائف کی تفصیلات عوام کے لیے جاری کرتی ہے اور تمام ریکارڈ سرکاری پورٹل پر دستیاب ہے۔
ریکارڈ کے مطابق صدر آصف علی زرداری کو چائے کا سیٹ، تلوار، سنہری صحرائی ماڈل، اونی اوورکوٹ، قیمتی کلائی گھڑی، آرائشی اشیا، شطرنج کا سیٹ، آرائشی پیالہ اور آئل پینٹنگ سمیت مختلف تحائف موصول ہوئے، جو توشہ خانہ میں جمع کرا دیے گئے۔
خاتونِ اول آصفہ بھٹو زرداری اور بختاور بھٹو زرداری کو ہار اور زیورات کے سیٹ تحفے میں ملے، جبکہ خاتونِ اول کو ایک روایتی کُمِس سیٹ بھی دیا گیا۔
وزیراعظم شہباز شریف کو ڈھالیں، یادگاری تحائف، پورٹریٹ، ٹائی، فریم، تلواریں، ہار، انگوٹھی اور بالیوں پر مشتمل زیورات کا ڈبہ، قیمتی کلائی گھڑیاں، سکے، روایتی لباس، گھڑی، چینی دانی، گاڑی کا ماڈل، قلم، کف لنکس اور دیگر تحائف موصول ہوئے، جو توشہ خانہ میں جمع کروا دیے گئے۔
نائب وزیراعظم اسحاق ڈار کو آرائشی اشیا، روایتی چینی مہر، برمی کٹھ پتلی، میانمار کی ثقافتی تصویر، قیمتی کلائی گھڑی، گلدان، تمغہ، چمڑے کی بیلٹ، مصری مجسمہ، قلم اور کف لنکس کا سیٹ تحفے میں ملا۔
یہ بھی پڑھیں: ایئر بلیو کے بیڑے میں مزید تین جدید طیارے شامل کرنے کا فیصلہ
وفاقی وزیر برائے اقتصادی امور احد خان چیمہ کو "ازبکستان” کے عنوان سے کتاب اور ٹی شرٹ، جبکہ اقتصادی امور کے سیکریٹری کو اعلیٰ معیار کا قلم تحفے میں دیا گیا۔
وزیر اطلاعات عطا اللہ تارڑ کو بھی ایک قیمتی کلائی گھڑی موصول ہوئی، جبکہ قومی اسمبلی کے اسپیکر سردار ایاز صادق کو بڑا مٹی کا آرائشی مرتبان، سینیٹر سلیم مانڈوی والا کو قیمتی کلائی گھڑی، چیئرمین نیب کو کلائی گھڑی اور انٹرپول کی یادگاری کتاب تحفے میں ملی۔
ریکارڈ کے مطابق وزیراعظم کے معاونِ خصوصی طارق فاطمی، معاونِ خصوصی ہارون اختر، وزیراعظم کے ترجمان برائے غیر ملکی میڈیا مشرف علی زیدی اور دیگر سرکاری عہدیداروں کو بھی مختلف قیمتی تحائف موصول ہوئے، جنہیں توشہ خانہ میں جمع کرا دیا گیا۔
