لاہور(پاک ترک نیوز ) پنجاب پولیس نے ایک سال سے بھی کم عرصے میں لاہور ٹریفک پولیس کی وردی دوبارہ تبدیل کرنے کا فیصلہ کر لیا۔
پولیس ذرائع کے مطابق ٹریفک وارڈنز موجودہ سفید قمیض اور نیلی پتلون کی جگہ نئی سرمئی مائل نیلی وردی پہنیں گے، جبکہ نئی وردی جلد مرحلہ وار فراہم کی جائے گی۔
ذرائع کا کہنا ہے کہ یہ فیصلہ ڈپٹی انسپکٹر جنرل لاجسٹکس اینڈ پروکیورمنٹ کی زیر صدارت ہونے والے ایک اجلاس میں کیا گیا، جس میں لاجسٹکس، وسائل کے انتظام اور پنجاب ہائی وے پٹرول کے اعلیٰ افسران نے بھی شرکت کی۔
یہ بھی پڑھیں: پنجاب حکومت کا جھینگا فارمنگ انٹرن شپ پروگرام ، ماہانہ ایک لاکھ روپے وظیفہ مقرر
موجودہ وردی گزشتہ سال سابق چیف ٹریفک آفیسر اطہر وحید کے دور میں متعارف کرائی گئی تھی، جس کے لیے ہر ٹریفک وارڈن کو نئی وردی خریدنے کی غرض سے پانچ ہزار روپے بھی فراہم کیے گئے تھے۔
پولیس ذرائع کے مطابق نئی پالیسی کے تحت پنجاب ہائی وے پٹرول اپنی موجودہ وردی ہی استعمال کرتا رہے گا، تاہم ہائی وے پٹرول کے افسران اور اہلکاروں کو بھی ایک معیاری اور یکساں وردی فراہم کی جائے گی۔
