اسلام آباد ( پاک ترک نیوز) وفاقی حکومت نے ٹینیور ٹریک سسٹم (TTS) کے تحت خدمات انجام دینے والے اساتذہ کی تنخواہوں میں 35 فیصد اضافے کا باضابطہ نوٹیفکیشن جاری کر دی ۔ وزارتِ خزانہ کی جانب سے جاری کردہ آفس میمورنڈم کے مطابق یہ فیصلہ وزیراعظم محمد شہباز شریف کی منظوری کے بعد کیا گیا ہے اور نظرثانی شدہ ٹی ٹی ایس-2026 پے پیکیج کا اطلاق یکم جولائی 2026 سے ہوگا،
نوٹیفکیشن کے مطابق نظرثانی شدہ تنخواہی پیکیج کا اطلاق سرکاری جامعات میں ٹینیور ٹریک سسٹم کے تحت کام کرنے والے پروفیسرز، ایسوسی ایٹ پروفیسرز اور اسسٹنٹ پروفیسرز پر ہوگا۔
نئے پے اسکیل کے تحت پروفیسرز کی کم از کم تنخواہ 3 لاکھ 94 ہزار 875 روپے سے بڑھا کر 4 لاکھ 7 ہزار 230 روپے جبکہ زیادہ سے زیادہ تنخواہ 7 لاکھ 12 ہزار 30 روپے مقرر کی گئی ہے۔ اسی طرح ایسوسی ایٹ پروفیسرز کی تنخواہ 3 لاکھ 70 ہزار 810 روپے سے 6 لاکھ 45 ہزار 610 روپے اور اسسٹنٹ پروفیسرز کی تنخواہ 2 لاکھ 88 ہزار 20 روپے سے 5 لاکھ 53 ہزار 820 روپے کے درمیان مقرر کی گئی ہے۔
یہ بھی پڑھیں: نیتن یاہو کے عالمی گرفتاری وارنٹ جاری کئے جائیں۔استنبول کی عدالت کا حکم
وزارتِ خزانہ کے مطابق 30 جون 2026 تک ٹی ٹی ایس کے تحت خدمات انجام دینے والے اساتذہ کی بنیادی تنخواہ نئے پے اسکیل میں پوائنٹ ٹو پوائنٹ بنیاد پر مقرر کی جائے گی۔
نوٹیفکیشن میں واضح کیا گیا ہے کہ تنخواہوں میں اضافے سے پیدا ہونے والے مالی اخراجات متعلقہ جامعات اپنے وسائل سے پورے کریں گی، جبکہ وفاقی حکومت اس سلسلے میں کوئی اضافی مالی ذمہ داری برداشت نہیں کرے گی۔ ٹی ٹی ایس ملازمین کی سروس سے متعلق دیگر تمام شرائط و ضوابط بدستور برقرار رہیں گے۔
