اسلام آباد ( پاک ترک نیوز) پاکستان منرل ڈیولپمنٹ کارپوریشن نے مختلف شعبوں سے تعلق رکھنے والے طلبہ کے لیے دو ماہ پر مشتمل معاوضہ یافتہ انٹرن شپ پروگرام کا اعلان کر دیا ، جس کے تحت منتخب امیدواروں کو 25 ہزار روپے ماہانہ وظیفہ دیا جائے گا۔
یہ پروگرام ہائر ایجوکیشن کمیشن سے تسلیم شدہ جامعات اور کالجوں کے آخری سمسٹر یا آخری سال کے طلبہ کے لیے متعارف کرایا گیا ہے تاکہ انہیں اپنے متعلقہ شعبوں میں عملی تجربہ حاصل ہو سکے۔
پی ایم ڈی سی کے مطابق انٹرن شپ کے لیے مائننگ انجینئرنگ، جیالوجی، مارکیٹنگ، فنانس، پروکیورمنٹ، ہیومن ریسورس، قانون اور انفارمیشن ٹیکنالوجی کے طلبہ درخواست دے سکتے ہیں۔ درخواست گزاروں کے لیے آخری سمسٹر یا آخری سال میں زیر تعلیم ہونا اور کم از کم 3.0 سی جی پی اے یا اس کے مساوی تعلیمی کارکردگی رکھنا لازمی قرار دیا گیا ہے۔
ادارے کی جانب سے جاری تفصیلات کے مطابق آپریشنز مائننگ کے لیے 2، جیالوجی کے لیے 2، فنانس، پروکیورمنٹ، مارکیٹنگ، انفارمیشن ٹیکنالوجی اور قانونی شعبے کے لیے ایک، جبکہ ہیومن ریسورس کے لیے 2 نشستیں مختص کی گئی ہیں۔
یہ بھی پڑھیں: وفاقی حکومت کا ٹی ٹی ایس اساتذہ کی تنخواہوں میں 35 فیصد اضافے کا باضابطہ اعلان
ہر شعبے کے لیے متعلقہ ڈگری یا مساوی اہلیت رکھنے والے امیدوار درخواست دینے کے اہل ہوں گے۔پی ایم ڈی سی نے بتایا ہے کہ دلچسپی رکھنے والے طلبہ اپنی درخواستیں ادارے کی سرکاری ویب سائٹ کے ذریعے آن لائن جمع کرا سکتے ہیں۔ امیدواروں کا انتخاب مکمل طور پر میرٹ کی بنیاد پر کیا جائے گا، جبکہ صرف شارٹ لسٹ کیے گئے امیدواروں کو ٹیسٹ یا انٹرویو کے لیے بلایا جائے گا۔
ادارے نے واضح کیا ہے کہ نامکمل یا مقررہ تاریخ کے بعد موصول ہونے والی درخواستیں قبول نہیں کی جائیں گی اور ٹیسٹ یا انٹرویو میں شرکت کے لیے کوئی سفری یا یومیہ الاؤنس نہیں دیا جائے گا۔
