بیروت (پاک ترک نیوز )لبنان تنظیم حزب اللہ کے سربراہ نعیم قاسم کا کہنا ہے کہ جب تک اسرائیل لبنانی سرزمین پرموجود ہے مزاحمت جاری رہےگی ،جب تک ہمارے دیہات پربمباری ہوتی رہےگی ہمارے لوگ شہیدہوتے رہیں گے ، شمالی اسرائیل محفوظ نہیں رہےگا، اسرائیل کے ساتھ بات چیت کاعمل انتہائی شرمناک ہے،
واضح رہے کہ آج امریکا کی ثالثی میں اسرائیل اور لبنان جنگ بندی پر متفق ہوئے تھے ۔ واشنگٹن میں ہوئے چوتھے سہ فریقی مذاکرات کے بعد مشترکہ اعلامیہ جاری کر دیا گیا ۔
امریکی محکمہ خارجہ کے مطابق اسرائیل اور لبنان نے جنگ بندی پر اتفاق کرلیا ہے ۔ دونوں ممالک کا بات چیت جاری رکھنے پر اتفاق ہو اہے۔اسرائیل اور لبنان 22 جون کو دوبارہ مذاکرات کریں گے۔
امریکی محکمہ خارجہ کے مطابق حزب اللہ کو حملے روکنا اور جنوبی لیطانی سیکٹر خالی کرنا ہوگا۔ پائلٹ زونز بنائے جائیں گے جن پر لبنانی فوج کا کنٹرول ہوگا ،غیرریاستی عناصر داخل نہیں ہوسکیں گے۔
اعلامیے میں کہا گیا ہے اسرائیل اور لبنان نے عزم دہرایا کہ ایک دوسرے کیخلاف جارحانہ عزائم نہیں، اسرائیل اور لبنان جامع معاہدہ کیلئے اقدامات کریں گے۔ جنگ بندی کا مقصد خطے میں کشیدگی کم کرنا ہے۔
