سرگودھا میں دھند کا قہر،ٹرک نہر میں جا گرا، 14 افراد جاں بحق

سرگودھا:(پاک ترک نیوز)سرگودھا میں شدید دھند ایک بار پھر قیمتی جانیں نگل گئی، جہاں کوٹ مومن کے نواحی علاقے گلہ پور بنگلہ کے قریب پیش آنے والے افسوسناک ٹریفک حادثے میں 14 افراد جان کی بازی ہار گئے جبکہ متعدد زخمی ہو گئے۔
حادثہ اس وقت پیش آیا جب ایک منی ٹرک، جس میں مرد، خواتین اور بچے سوار تھے، حدِ نگاہ انتہائی کم ہونے کے باعث بے قابو ہو کر سڑک سے اتر گیا اور قریب موجود خشک نہر میں جا گرا۔
ریسکیو حکام کے مطابق منی ٹرک میں مجموعی طور پر 23 افراد سوار تھے جو ایک جنازے میں شرکت کے لیے سفر کر رہے تھے۔
شدید دھند کے باعث ڈرائیور کو سامنے کا راستہ واضح دکھائی نہ دیا جس کے نتیجے میں گاڑی حادثے کا شکار ہو گئی۔
ٹرک نہر میں گرنے کے بعد کئی افراد اس کے نیچے دب گئے، جس سے موقع پر ہی متعدد اموات ہو گئیں۔اطلاع ملتے ہی ریسکیو ٹیمیں جائے حادثہ پر پہنچ گئیں اور امدادی کارروائیاں شروع کی گئیں۔
ریسکیو اہلکاروں نے زخمیوں اور لاشوں کو نکال کر فوری طور پر ٹی ایچ کیو اسپتال منتقل کیا۔ اسپتال ذرائع کے مطابق حادثے میں زخمی ہونے والے کئی افراد کی حالت تشویشناک تھی، جن میں سے مزید افراد دوران علاج دم توڑ گئے، یوں جاں بحق افراد کی مجموعی تعداد 14 ہو گئی۔
جاں بحق ہونے والوں میں 6 کمسن بچے، 5 خواتین اور 3 مرد شامل ہیں، جس سے علاقے میں سوگ کی فضا قائم ہو گئی۔ حادثے کے بعد اہلِ علاقہ کی بڑی تعداد اسپتال پہنچ گئی، جبکہ لواحقین غم سے نڈھال نظر آئے۔دوسری جانب پولیس نے واقعے کی تحقیقات شروع کر دی ہیں اور ابتدائی طور پر حادثے کی وجہ شدید دھند اور حد نگاہ میں کمی کو قرار دیا جا رہا ہے۔ انتظامیہ نے شہریوں سے اپیل کی ہے کہ دھند کے موسم میں غیر ضروری سفر سے گریز کریں اور احتیاطی تدابیر اختیار کریں تاکہ ایسے المناک واقعات سے بچا جا سکے۔