بلوچستان میں سی ٹی ڈی کی کامیاب کارروائیاں، 14 دہشتگرد ہلاک، 3 اہلکار زخمی

کوئٹہ: (پاک ترک نیوز) بلوچستان میں محکمہ انسدادِ دہشت گردی (سی ٹی ڈی) نے خفیہ اطلاعات کی بنیاد پر دو مختلف مقامات پر کارروائیاں کرتے ہوئے مجموعی طور پر 14 دہشت گردوں کو ہلاک کر دیا، جبکہ ایک جھڑپ میں 3 اہلکار زخمی ہوئے۔
حکام کے مطابق کارروائیاں صوبے میں ممکنہ تخریبی منصوبوں کو ناکام بنانے کے لیے کی گئیں۔
پہلا آپریشن کوئٹہ کے نواحی علاقے درخشاں میں کیا گیا، جہاں سیکیورٹی ذرائع کو شدت پسندوں کی موجودگی اور حساس مقامات کو نشانہ بنانے کی تیاریوں سے متعلق اطلاع ملی تھی۔
سی ٹی ڈی ٹیم نے علاقے کا محاصرہ کیا تو دہشت گردوں نے فائرنگ شروع کر دی۔ جوابی کارروائی میں 8 شدت پسند مارے گئے۔ فائرنگ کے تبادلے کے دوران سی ٹی ڈی کے3 اہلکار زخمی ہوئے جنہیں فوری طور پر قریبی ہسپتال منتقل کیا گیا۔
حکام کے مطابق زخمی اہلکاروں کی حالت خطرے سے باہر ہے۔سیکیورٹی ذرائع کا کہنا ہے کہ مارے گئے افراد کا تعلق ایک کالعدم تنظیم سے تھا اور وہ صوبے میں سرکاری تنصیبات اور شہری اہداف پر حملوں کی منصوبہ بندی میں ملوث تھے۔
جائے وقوعہ سے اسلحہ، گولہ بارود اور دیگر تخریبی سامان برآمد کر کے قبضے میں لے لیا گیا ہے جبکہ مزید تفتیش جاری ہے۔دوسری کارروائی ضلع بارکھان میں کی گئی جہاں انٹیلی جنس اطلاعات پر مبنی آپریشن کے دوران 6 شدت پسند مارے گئے۔
حکام کے مطابق وہاں بھی ملزمان نے گرفتاری سے بچنے کے لیے فائرنگ کی جس کے بعد فورسز نے مؤثر جوابی اقدام کیا۔ اس کارروائی میں سیکیورٹی اہلکار محفوظ رہے۔
صوبائی حکام نے کہا ہے کہ دہشت گرد عناصر کے خلاف کارروائیاں تسلسل کے ساتھ جاری رہیں گی اور عوام سے اپیل کی گئی ہے کہ کسی بھی مشکوک سرگرمی کی فوری اطلاع متعلقہ اداروں کو دیں۔ حکام کے مطابق حالیہ اقدامات کا مقصد صوبے میں امن و امان کی صورتحال کو مزید مستحکم بنانا ہے۔