اسلام آباد (پاک ترک نیوز )وفاق اور خیبرپختونخوا حکومت کے درمیان کشیدگی کے باعث صوبے میں سیاسی غیر یقینی صورتحال پیدا ہوگئی ہے۔
ذرائع کے مطابق وفاقی حکومت کی جانب سے گورنر راج یا ہنگامی اقدامات سمیت مختلف آپشنز پر غور کیا جارہا ہے، جبکہ پی ٹی آئی نے بھی جوابی حکمت عملی پر مشاورت شروع کردی ہے۔
ذرائع کا کہنا ہے کہ پی ٹی آئی کی جانب سے اسمبلی تحلیل کرنے، وزیراعلیٰ کی تبدیلی یا ان ہاؤس تبدیلی سمیت مختلف آپشنز زیرِ غور ہیں، جبکہ وزیراعلیٰ کے خلاف تحریک عدم اعتماد کی خبریں بھی گردش کررہی ہیں۔
آئین کے آرٹیکل 136 کے تحت وزیراعلیٰ کے خلاف تحریک عدم اعتماد پیش کی جاسکتی ہے، جبکہ آرٹیکل 130 کے تحت گورنر وزیراعلیٰ سے ایوان میں اکثریت ثابت کرنے کے لیے اعتماد کا ووٹ لینے کا کہہ سکتے ہیں۔
27 ستمبر کا اسلام آباد مارچ ایک ہفتے کے لیے مؤخر ہونے کے باوجود وفاق اور خیبرپختونخوا کے درمیان سیاسی کشیدگی برقرار ہے۔
