لاہور(پاک ترک نیوز )لاہور کے ڈی آئی جی آپریشنز فیصل کامران نے دعویٰ کیا ہے کہ پی ٹی آئی احتجاج کے حوالے سے ایک مبینہ آڈیو سامنے آئی ہے، جس میں خاتون رہنما فاطمہ حیدر 20 سے 30 افراد کو تربیت دے کر لاہور لانے کا مطالبہ کررہی ہیں۔
ڈی آئی جی کے مطابق آڈیو ایک گرفتار شخص امین کے موبائل فون سے ملی، جس کا تعلق ساہیوال سے اور مبینہ طور پر خاتون رہنما کی فیملی سے ہے۔
انہوں نے بتایا کہ آڈیو کا فرانزک تجزیہ کرایا جائے گا جبکہ ایک اور گرفتاری بھی جلد متوقع ہے۔ ڈی آئی جی کا کہنا تھا کہ پولیس احتجاج کے نام پر کسی کو امن و امان خراب کرنے کی اجازت نہیں دے گی، تاہم پرامن احتجاج ہر شہری کا حق ہے۔
فیصل کامران نے ڈیفنس سی میں مبینہ اجتماعی زیادتی کے واقعے کی تحقیقات کے حوالے سے بتایا کہ ملزمان کی گاڑی قبضے میں لے لی گئی ہے اور سی سی ڈی، آپریشنز اور تفتیشی ونگ مشترکہ طور پر تحقیقات کررہے ہیں۔
