لاہور( پاک ترک نیوز) انسداد دہشت گردی عدالت نے 9 مئی کیس میں حماد اظہر کے جوڈیشل ریمانڈ میں 24 نومبر تک توسیع کر دی؛ حماد اظہر نے بیرک میں بنیادی سہولیات کی عدم فراہمی اور واش روم تک کیمروں سے نگرانی کو حقِ پرائیویسی کی خلاف ورزی قرار دے دیا۔لاہور کی انسداد دہشت گردی کی خصوصی عدالت میں 9 مئی سے متعلق کیس کی سماعت ہوئی۔ جوڈیشل ریمانڈ ختم ہونے پر حماد اظہر کو عدالت میں پیش کیا گیا، جہاں عدالت نے ان کے جوڈیشل ریمانڈ میں 24 نومبر تک توسیع کر دی۔
دورانِ سماعت حماد اظہر نے جیل میں بی کلاس سہولیات کی فراہمی کے لیے درخواست دائر کر دی۔ درخواست میں مؤقف اختیار کیا گیا ہے کہ بیرک میں بیڈ، کرسی اور میز جیسی بنیادی سہولیات بھی دستیاب نہیں ہیں۔ حماد اظہر نے بی کلاس کی تمام سہولیات کے اخراجات خود برداشت کرنے کی پیشکش بھی کی ہے۔حماد اظہر نے بیرک اور واش روم میں نصب سی سی ٹی وی کیمروں کے خلاف بھی درخواست دائر کی۔ ان کا مؤقف ہے کہ بیرک میں دو کیمرے نصب ہیں، جو نجی زندگی اور بنیادی انسانی وقار کے منافی ہیں۔ درخواست کے مطابق دونوں کیمرے باتھ روم اور واش روم کے حصے کی بھی واضح نگرانی کرتے ہیں، جو حقِ پرائیویسی کی خلاف ورزی ہے۔
یہ بھی پڑھیں: نئے صوبوں کا قیام قومی ضرورت، پی ٹی آئی اصولی طور پر حامی ہے، شوکت یوسفزئی
درخواست گزار نے موجودہ سی گریڈ سہولیات کو ناکافی قرار دیتے ہوئے بی کلاس سہولیات فراہم کرنے اور بیرک سے دونوں سی سی ٹی وی کیمرے ہٹانے کی استدعا کی ہے۔
