اسلام آباد(پاک ترک نیوز ) صدرِ مملکت آصف علی زرداری، وزیراعظم محمد شہباز شریف، وفاقی وزیر داخلہ محسن نقوی اور وزیراعلیٰ پنجاب مریم نواز شریف نے پنجگور میں فتنہ الہندوستان کے 5 دہشت گردوں کو ہلاک کرنے پر سیکیورٹی فورسز کو خراجِ تحسین پیش کیا ہے۔
صدر آصف علی زرداری نے کہا کہ غیر ملکی پشت پناہی میں سرگرم دہشت گرد عناصر کے خلاف کارروائیاں مکمل خاتمے تک جاری رہیں گی۔ دہشت گردی کے خلاف سیکیورٹی فورسز کا عزم قابلِ تحسین ہے۔
صدرِ مملکت کا کہنا تھا کہ بیرونی سرپرستی میں سرگرم پاکستان دشمن دہشت گرد عناصر کے مذموم عزائم ہر قیمت پر ناکام بنائے جائیں گے۔
وزیراعظم محمد شہباز شریف نے ضلع پنجگور میں فتنہ الہندوستان کے دہشت گردوں کے خلاف کامیاب کارروائی پر سیکیورٹی فورسز کو خراجِ تحسین پیش کیا۔ وزیراعظم نے آپریشن کے دوران 5 دہشت گردوں کو ہلاک کرنے پر فورسز کی ستائش کی۔
وزیراعظم نے کہا کہ عزمِ استحکام کے ویژن کے تحت سیکیورٹی فورسز دہشت گردی کے خلاف شاندار کامیابیاں حاصل کر رہی ہیں۔ ملک سے ہر قسم کی دہشت گردی کے مکمل خاتمے کے لیے پرعزم ہیں۔
وفاقی وزیر داخلہ محسن نقوی نے بھی پنجگور میں کامیاب انٹیلی جنس بیسڈ آپریشن پر سیکیورٹی فورسز کو خراجِ تحسین پیش کیا۔
محسن نقوی نے 5 دہشت گردوں کو ہلاک کرنے پر سیکیورٹی فورسز کی پیشہ ورانہ صلاحیتوں اور جرات کو سراہتے ہوئے کہا کہ فورسز نے بروقت کارروائی کرکے فتنہ الہندوستان کے دہشت گردوں کے ناپاک عزائم ناکام بنائے۔
وزیر داخلہ کے مطابق بلوچستان میں امن دشمن عناصر کے خلاف سیکیورٹی فورسز کی کامیاب کارروائیاں قابلِ تحسین ہیں۔ فتنہ الہندوستان کے دہشت گردوں کو کہیں چھپنے کی جگہ نہیں ملے گی۔
انہوں نے کہا کہ قوم دہشت گردی کے خلاف یکجان ہے اور سیکیورٹی فورسز کے ساتھ کھڑی ہے۔
دوسری جانب وزیراعلیٰ پنجاب مریم نواز شریف نے بھی ضلع پنجگور میں دہشت گردوں کی سرکوبی کے لیے کامیاب کارروائی پر اظہارِ تشکر کیا اور 5 دہشت گردوں کو ہلاک کرنے پر سیکیورٹی فورسز کو خراجِ تحسین پیش کیا۔
