واشنگٹن (پاک ترک نیوز )امریکا میں ملک گیر فضائی تعطل کے دو روز بعد بھی فضائی سفر کا نظام مکمل طور پر بحال نہ ہو سکا، اتوار کے روز بھی ہزاروں پروازیں منسوخ اور تاخیر کا شکار رہیں، جبکہ حکام نے معمول کی پروازیں بحال ہونے کے لیے پیر تک کا وقت لگنے کا امکان ظاہر کیا ہے۔امریکی وزیر ٹرانسپورٹ شان ڈفی کے مطابق پروازوں اور عملے کی بڑی تعداد اپنے مقررہ مقامات پر موجود نہیں، اس لیے فضائی نظام کو معمول پر لانے میں وقت لگے گا۔ اتوار کو امریکا میں 8 ہزار 800 سے زائد پروازیں تاخیر کا شکار ہوئیں جبکہ 2 ہزار 400 سے زیادہ پروازیں منسوخ کر دی گئیں۔
یہ بحران جمعے کے روز فضائی ٹریفک کنٹرول کے اہم نظام میں تکنیکی خرابی کے باعث پیدا ہوا، جس کے نتیجے میں امریکا میں پروازوں کی روانگی پر ملک گیر پابندی عائد کرنا پڑی۔ اس وقت 3 ہزار 500 سے زائد طیارے فضا میں موجود تھے، جن میں سے بعض کا رخ دوسرے ہوائی اڈوں کی جانب موڑ دیا گیا جبکہ دیگر نے اپنی منزل کی طرف سفر جاری رکھا۔ملک گیر پابندی تقریباً ساڑھے چار گھنٹے بعد ختم کر دی گئی، تاہم اس کے اثرات ہفتے اور اتوار تک برقرار رہے۔ جمعے کے بعد ہزاروں پروازیں منسوخ ہوئیں اور متعدد تاخیر کا شکار رہیں۔ ہفتے کے روز بھی 5 ہزار 900 سے زائد پروازیں منسوخ جبکہ 7 ہزار سے زیادہ تاخیر کا شکار ہوئیں۔اس صورتحال کے باعث مسافر طیاروں کے اندر رن وے پر پھنسے رہے، جبکہ متعدد افراد ہوائی اڈوں پر رات گزارنے اور اپنی پروازوں کی نئی معلومات حاصل کرنے کے لیے پریشان دکھائی دیے۔ فضائی تعطل کے اثرات امریکا سے باہر بھی پہنچے اور برطانیہ و یورپ سے روانہ ہونے والی بعض پروازیں بھی منسوخ کرنا پڑیں۔امریکی حکام کے مطابق ابتدائی تحقیقات میں فضائی ٹریفک کنٹرولرز اور پائلٹس کے درمیان رابطے کے لیے استعمال ہونے والے ایک اہم نظام میں خرابی سامنے آئی ہے۔ وزیر ٹرانسپورٹ شان ڈفی نے بتایا کہ تانبے کی تاروں کی جگہ فائبر نظام نصب کرنے کے منصوبے کے تحت آرکنساس کے علاقے ایل ڈوراڈو میں ایک نیا رابطہ جاتی آلہ نصب کیا گیا تھا، جس سے غلط برقی اشارے پورے نظام میں پھیل گئے۔
یہ بھی پڑھیں: گورنر راج اور ایمرجنسی سے متعلق مقدمات پر پشاور ہائی کورٹ میں سماعت نہیں ہوگی، بیرسٹر گوہر
شان ڈفی کا کہنا ہے کہ امریکا کے فضائی ٹریفک کنٹرول نظام کو جدید بنانے کے لیے بڑے پیمانے پر سرمایہ کاری اور مکمل اصلاحات کی ضرورت ہے، کیونکہ موجودہ نظام کئی دہائیوں سے نظر انداز کیا جاتا رہا ہے۔صدر ڈونلڈ ٹرمپ نے بھی کانگریس سے فضائی ٹریفک کنٹرول نظام کی جدید کاری کے لیے اضافی فنڈز منظور کرنے کا مطالبہ کیا ہے۔ ان کا کہنا ہے کہ پچاس سال پرانے نظام کو فوری طور پر تبدیل کرنے کی ضرورت ہے اور جدید نظام کی تعمیر تیزی سے مکمل کی جا سکتی ہے۔ماہرین ہوا بازی کے مطابق امریکا میں طیاروں اور فضائی ٹریفک کنٹرول کے درمیان رابطے کے لیے اب بھی پرانی ٹیکنالوجی استعمال کی جا رہی ہے، جسے جدید تقاضوں سے ہم آہنگ کرنے میں تاخیر سنگین مسائل پیدا کر سکتی ہے












