میکسیکو(پاک ترک نیوز ) اٹھائیس ٹیمیں ورلڈ کپ فٹبال کے ناک آؤٹ مرحلے میں پہنچ گئیں ۔شمالی امریکہ میں جاری فیفا ورلڈ کپ 2026 اپنے گروپ مرحلے کے اختتامی لمحات میں داخل ہو چکا ہے، جبکہ ٹورنامنٹ اب ناک آؤٹ مرحلے کی جانب بڑھ رہا ہے۔ 48 ٹیموں پر مشتمل ورلڈ کپ کے نئے فارمیٹ کے تحت راؤنڈ آف 32 کا آغاز 28 جون سے ہوگا۔
اس بار ورلڈ کپ کی تاریخ میں پہلی مرتبہ 48 ٹیمیں شریک ہیں۔ نئے فارمیٹ کے مطابق 12 گروپس کی پہلی اور دوسری پوزیشن حاصل کرنے والی 24 ٹیمیں جبکہ آٹھ بہترین تیسرے نمبر پر آنے والی ٹیمیں بھی ناک آؤٹ مرحلے کے لیے کوالیفائی کریں گی۔ اس طرح مجموعی طور پر 32 ٹیمیں راؤنڈ آف 32 میں ایکشن میں نظر آئیں گی۔
ناک آؤٹ مرحلے کے بعد مقابلے راؤنڈ آف 16، کوارٹر فائنلز، سیمی فائنلز، تیسری پوزیشن کے میچ اور پھر 19 جولائی کو ہونے والے فائنل تک جاری رہیں گے۔
اب تک راؤنڈ آف 32 کے لیے 28 ٹیموں نے اپنی جگہ یقینی بنا لی ہے۔ ان میں کولمبیا، ارجنٹینا، فرانس، ناروے، جرمنی، امریکا، میکسیکو، سوئٹزرلینڈ، کینیڈا، برازیل، مراکش، جنوبی افریقہ، آئیوری کوسٹ، بوسنیا و ہرزیگووینا، ایکواڈور، نیدرلینڈز، جاپان، سویڈن، آسٹریلیا، اسپین، کیپ وردے، پیراگوئے، مصر، انگلینڈ، گھانا، پرتگال، بیلجیم اور سینیگال شامل ہیں، جبکہ باقی چار ٹیموں کا فیصلہ گروپ مرحلے کے آخری میچوں کے بعد ہوگا۔
راؤنڈ آف 32 کے پہلے میچ میں 28 جون کو جنوبی افریقہ کا مقابلہ کینیڈا سے ہوگا۔انتیس جون کو برازیل اور جاپان، جرمنی اور پیراگوئے، جبکہ نیدرلینڈز اور مراکش کی ٹیمیں آمنے سامنے ہوں گی۔ تیس جون کو آئیوری کوسٹ کا مقابلہ ناروے سے، فرانس کا سویڈن سے جبکہ میکسیکو کا سامنا بہترین تیسرے نمبر پر آنے والی ایک ٹیم سے ہوگا۔
یکم جولائی کو امریکا اور بوسنیا و ہرزیگووینا کے درمیان میچ کھیلا جائے گا، جبکہ گروپ جی اور گروپ ایل کی فاتح ٹیموں کے مقابلے بہترین تیسرے نمبر پر آنے والی ٹیموں سے ہوں گے۔
2 جولائی کو اسپین کا مقابلہ گروپ جے کی رنر اپ ٹیم سے ہوگا، جبکہ گروپ کے اور گروپ ایل کی رنر اپ ٹیمیں بھی آمنے سامنے آئیں گی۔ اسی روز سوئٹزرلینڈ کا مقابلہ بھی بہترین تیسرے نمبر پر آنے والی ایک ٹیم سے ہوگا۔
راؤنڈ آف 32 کے آخری روز، 3 جولائی کو آسٹریلیا کا مقابلہ گروپ جی کی رنر اپ ٹیم سے، ارجنٹینا کا سامنا کیپ وردے سے جبکہ گروپ کے کی فاتح ٹیم کا مقابلہ بہترین تیسرے نمبر پر آنے والی ایک اور ٹیم سے ہوگا۔
گروپ مرحلے کے باقی میچز مکمل ہونے کے بعد راؤنڈ آف 32 کے تمام مقابلوں کی حتمی ترتیب اور باقی کوالیفائی کرنے والی ٹیموں کا اعلان کر دیا جائے گا۔
