لاہور( پاک ترک نیوز) دنیا میں امیر افراد کی کمی نہیں، مگر کیا آپ جانتے ہیں کہ اب ایک ایسا خصوصی کلب بھی بن چکا ہے جس میں صرف وہی لوگ شامل ہو سکتے ہیں جن کی دولت 100 بلین ڈالر یعنی تقریباً 28ہزار ارب پاکستانی روپے سے بھی زیادہ ہو۔ فوربز کی تازہ فہرست کے مطابق اس ڈالر کلب” کے ارکان کی تعداد بڑھ کر بیس تک پہنچ گئی ہے۔
دنیا کے امیر ترین افراد کی اس فہرست میں ٹیکنالوجی کے بادشاہوں کا غلبہ ہے۔ سب سے اوپر نمبر ہے ایلون مسک کا، جنہوں نے ٹیکنالوجی اور خلائی صنعت میں سرمایہ کاری کے ذریعے بے پناہ دولت کمائی ۔۔دنیا کے امیر ترین شخص ایلون مسک کی دولت 839 ارب ڈالر تک پہنچ چکی ہے۔
گوگل کے شریک بانی لیری پیج کی دولت 257ارب ڈالر ہے اور وہ فہرست میں دوسرے نمبر پر ہیں ،،،سرگئی برن 237ارب ڈالر کے ساتھ تیسرے اور ایمیزون کے بانی جیف بیزوس 224ارب ڈالر کے ساتھ چوتھے نمبر پر ہیں ۔
اوریکل کے لیری ایلیسن اور میٹا کے مارک زکربرگ بھی 100 بلین ڈالر سے زیادہ دولت رکھنے والوں میں شامل ہو گئے ۔
ٹیکنالوجی کے علاوہ لگژری اور سرمایہ کاری کے شعبے سے بھی کئی ارب پتی اس کلب کا حصہ ہیں۔ فرانس کے بزنس ٹائیکون برنارڈ ارنولٹ، این ویڈیا کے سی ای او جینسن ہوانگ اور معروف سرمایہ کار وارن بفیٹ بھی اس فہرست میں نمایاں ہیں۔
یہ وہ ارب پتی ہیں جن کی دولت نہ صرف کئی ممالک کے بجٹ سے زیادہ ہے بلکہ عالمی معیشت پر بھی اثر ڈالتی ہے۔۔ماہرین کے مطابق دنیا میں ارب پتی افراد کی تعداد مسلسل بڑھ رہی ہے اور اسٹاک مارکیٹ، مصنوعی ذہانت اور ٹیکنالوجی کمپنیوں کی تیز رفتار ترقی نے اس دولت میں غیر معمولی اضافہ کیا ہے۔
دلچسپ بات یہ ہے کہ چند سال پہلے تک 100 بلین ڈالر سے زیادہ دولت رکھنے والے افراد کی تعداد انگلیوں پر گنی جا سکتی تھی، مگر اب یہ کلب تیزی سے پھیل رہا ہے۔ ماہرین کا کہنا ہے کہ آنے والے برسوں میں شاید دنیا کا پہلا کھرب پتی یعنی ٹریلینئر بھی سامنے آ جائے۔
