لاہور:(پاک ترک نیوز)رمضان المبارک کا بابرکت مہینہ جاری ہے، اور دنیا بھر میں لاکھوں مسلمان روزے رکھ رہے ہیں۔ یہ وہ مقدس مہینہ ہے جس میں اللہ تعالیٰ نے قرآن مجید نازل فرمایا۔
روزہ اسلام کے پانچ بنیادی ارکان میں سے ایک ہے، اور یہ صرف عبادت ہی نہیں بلکہ جسمانی اور روحانی تربیت بھی ہے۔
لیکن سوال یہ ہے کہ روزے کے دوران ایسی کیا خوراک لی جائے جس سے نہ کمزوری ہو، نہ شدید پیاس لگے اور نہ ہی دن بھر تھکن محسوس ہو؟
سب سے پہلے بات کرتے ہیں سحری کی۔ سحری پورے دن کی بنیاد ہے۔ اگر آپ سحری چھوڑ دیتے ہیں یا صرف چائے اور بسکٹ پر گزارا کرتے ہیں تو دن مشکل ہو سکتا ہے۔
ماہرین کے مطابق سحری میں پروٹین، کمپلیکس کاربوہائیڈریٹس، فائبر اور وٹامنز ضرور شامل ہونے چاہئیں۔
آپ انڈے، دہی، دودھ، دلیہ، جو یا گندم کی روٹی استعمال کریں۔ اس کے ساتھ کھیرا، ٹماٹر اور تازہ پھل شامل کریں۔ چنے، دالیں اور پھلیاں دیر تک پیٹ بھرا رکھتی ہیں کیونکہ ان میں فائبر زیادہ ہوتا ہے۔
اب بات کرتے ہیں کن چیزوں سے پرہیز کرنا چاہیے۔ بہت زیادہ نمکین، مصالحہ دار اور تلی ہوئی اشیاء سحری میں کھانے سے پیاس زیادہ لگتی ہے۔
اسی طرح زیادہ چائے یا کافی پینے سے جسم ڈی ہائیڈریٹ ہو سکتا ہے کیونکہ کیفین پانی کی کمی بڑھاتی ہے۔افطار سے سحری کے درمیان کم از کم دو سے تین لیٹر پانی پینا ضروری ہے تاکہ جسم میں پانی کی کمی نہ ہو۔
افطار میں بھی اعتدال رکھیں۔ بہت زیادہ تلی ہوئی اشیاء، کولڈ ڈرنکس اور مٹھائیاں فوری توانائی تو دیتی ہیں لیکن بعد میں سستی اور تیزابیت کا باعث بن سکتی ہیں۔
یاد رکھیں! رمضان صرف پیٹ خالی رکھنے کا نام نہیں بلکہ متوازن غذا، صبر اور صحت مند طرزِ زندگی اپنانے کا مہینہ ہے۔ اگر آپ سمجھداری سے کھائیں گے تو پورا مہینہ توانائی اور عبادت کے جذبے کے ساتھ گزار سکیں گے۔
