آسٹریلیا کیخلاف ویسٹ انڈیز کی ٹیسٹ ٹیم تاریخ کے دوسرے کم ترین اسکور پر ڈھیر

کراچی(پاک ترک نیوز) آسٹریلیا نے تیسرے اور آخری ڈے نائٹ ٹیسٹ میں ویسٹ انڈیز کو 176 رنز سے شکست دے کر سیریز 0-3 سے اپنے نام کرلی۔
میچ کا سب سے حیران کن لمحہ ویسٹ انڈیز کی دوسری اننگز رہی، جہاں پوری ٹیم صرف 27 رنز پر ڈھیر ہوگئی۔ یہ گزشتہ 70 سال میں ٹیسٹ کرکٹ کی دوسری کم ترین اننگز ہے۔
1955 میں نیوزی لینڈ کی ٹیم آکلینڈ میں انگلینڈ کے خلاف 26 رنز پر آؤٹ ہوئی تھی، جو اس فہرست میں سرفہرست ہے۔ جنوبی افریقہ کی ٹیم بھی دو بار 30 رنز پر آؤٹ ہو چکی ہے۔
ویسٹ انڈیز کی اننگز میں 7 کھلاڑی بغیر کوئی رن بنائے آؤٹ ہوئے، جن میں 4 گولڈن ڈک شامل تھے۔
آسٹریلیا کے فاسٹ بولرز نے شاندار کارکردگی کا مظاہرہ کیا۔ اسکاٹ بولینڈ نے ہیٹ ٹرک کی جبکہ مچل اسٹارک نے اپنے 100ویں ٹیسٹ میچ میں کیریئر کی بہترین بولنگ کرتے ہوئے صرف 9 رنز کے عوض 6 وکٹیں حاصل کیں اور 400 وکٹوں کا سنگ میل عبور کیا۔ انہیں مین آف دی میچ قرار دیا گیا۔
میچ میں آسٹریلیا نے پہلی اننگز میں 225 اور دوسری میں 121 رنز بنائے، جبکہ ویسٹ انڈیز نے پہلی اننگز میں 143 اور دوسری میں صرف 27 رنز اسکور کیے۔
اس جیت کے ساتھ آسٹریلیا نے تین میچوں کی ٹیسٹ سیریز میں ویسٹ انڈیز کو وائٹ واش کردیا۔