اسلام آباد ( پاک ترک نیوز) فیڈرل بورڈ آف ریونیو نے انکم ٹیکس گوشوارے جمع کرانے کی آخری تاریخ آج تیس ستمبر مقرر کر دی ہے، ٹیکس دہندگان کو مقررہ مدت کے اندر گوشوارے جمع کرانے کی ہدایت کی گئی ہے۔ذرائع کے مطابق مقررہ تاریخ کے بعد گوشوارے جمع کرانے والے افراد پر جرمانے عائد ہوں گے، جبکہ یکم اکتوبر سے تاخیر سے گوشوارے جمع کرانے والوں کے لیے موجودہ درجہ بندی ختم ہونے کا امکان ہے۔
ذرائع کا کہنا ہے کہ تاخیر سے گوشوارہ جمع کرانے پر جرمانہ پچیس ہزار روپے تک عائد کیا جا سکتا ہے، جبکہ انجمنوں اور شراکت داری پر مشتمل اداروں کے لیے جرمانہ پچاس ہزار روپے تک کرنے کی تجویز ہے۔کمپنیوں سے تاخیر پر ایک لاکھ روپے تک جرمانہ وصول کرنے کی تجویز بھی زیر غور ہے۔ایف بی آر نے ٹیکس دہندگان کو گوشواروں میں درست اور مکمل معلومات درج کرنے کی ہدایت کی ہے، جبکہ اثاثوں کی غلط یا نامکمل تفصیلات فراہم کرنے پر کارروائی کی جا سکتی ہے۔
یہ بھی پڑھیں: انکم ٹیکس گوشوارے جمع کروانے کا کل آخری دن
ایف بی آر کے مطابق انکم ٹیکس گوشوارے تیس ستمبر تک جمع کرائے جائیں اور گوشواروں کے ساتھ متعلقہ دستاویزی ثبوت بھی فراہم کیے جائیں۔












