لاہور( پاک ترک نیوز) وزیراعلیٰ پنجاب مریم نواز نے صوبے کے مزید سات اضلاع میں گرین بس سروس کا باقاعدہ افتتاح کر دیا۔ نئی سروس کے تحت گجرات، نارووال، قصور، شیخوپورہ، ننکانہ صاحب، وہاڑی اور لودھراں کے شہری بھی جدید، آرام دہ اور کم خرچ سفری سہولت سے مستفید ہوں گے۔
وزیراعلیٰ پنجاب مریم نواز کا کہنا تھا کہ گرین بس منصوبہ عوام میں بے حد مقبول ہو چکا ہے اور حکومت کا مقصد ہر شہری کو محفوظ، معیاری اور سستی سفری سہولت فراہم کرنا ہے۔ انہوں نے کہا کہ گرین بسیں مکمل طور پر ایئر کنڈیشنڈ ہیں جبکہ مسافروں کی سہولت کے لیے ان میں مفت وائی فائی کی سہولت بھی فراہم کی گئی ہے۔
وزیراعلیٰ نے بتایا کہ بزرگ شہریوں، خواتین اور طلبہ کے لیے خصوصی سہولیات اور رعایتیں بھی متعارف کرائی گئی ہیں تاکہ زیادہ سے زیادہ افراد اس جدید ٹرانسپورٹ نظام سے فائدہ اٹھا سکیں۔ انہوں نے اعلان کیا کہ حکومت کا ہدف گرین بس سروس کو پنجاب کی ہر تحصیل اور ہر علاقے تک توسیع دینا ہے تاکہ شہری اور دیہی علاقوں کے عوام کو یکساں سفری سہولیات میسر آسکیں۔
یہ بھی پڑھیں: بلاول بمقابلہ مریم، کشمیر الیکشن پر سیاسی کشیدگی بڑھ گئی
دوسری جانب وزیراعلیٰ پنجاب مریم نواز نے لیڈی پولیس افسروں کی پاسنگ آؤٹ پریڈ کی تقریب سے خطاب کرتے ہوئے کہا کہ پنجاب آج گورننس، ترقی اور عوامی خدمت کے میدان میں ملک کے تمام صوبوں سے آگے ہے۔ انہوں نے کہا کہ پنجاب کی ترقی کی مثال دنیا میں دی جا رہی ہے اور اللہ کے فضل سے کوئی طاقت پنجاب کی ترقی کا سفر نہیں روک سکتی۔
وزیراعلیٰ نے نئی شامل ہونے والی لیڈی پولیس افسروں کو مبارکباد دیتے ہوئے کہا کہ انہیں پنجاب پولیس کا حصہ بننے والی بیٹیوں پر فخر ہے۔ انہوں نے چالیس ہفتوں کی سخت تربیت مکمل کرنے والی خواتین کی محنت، عزم اور حوصلے کو سراہتے ہوئے کہا کہ وردی صرف اعزاز نہیں بلکہ ایک بہت بڑی ذمہ داری بھی ہے۔
مریم نواز کا کہنا تھا کہ خواتین پولیس اہلکار معاشرے میں قانون کی بالادستی، خواتین کے تحفظ اور جرائم کے خاتمے میں اہم کردار ادا کریں گی۔ انہوں نے امید ظاہر کی کہ نئی افسران ایمانداری، دیانتداری اور پیشہ ورانہ صلاحیتوں کے ساتھ عوام کی خدمت کریں گی۔
تقریب کے دوران وزیراعلیٰ پنجاب نے لیڈی پولیس افسروں کی پاسنگ آؤٹ پریڈ کا معائنہ بھی کیا اور تربیت کے دوران نمایاں کارکردگی دکھانے والی افسران میں انعامات اور اعزازی اسناد تقسیم کیں ۔
