تہران ( پاک ترک نیوز) ایران کے سپریم لیڈر آیت اللہ علی خامنہ ای کی آخری آرام گاہ سے منسوب ایک ویڈیو سوشل میڈیا اور مختلف پلیٹ فارمز پر گردش کر رہی ہے، جسے پہلی مرتبہ منظرِ عام پر آنے والی خصوصی ویڈیو قرار دیا جا رہا ہے۔
رپورٹس کے مطابق، یہ ویڈیو رہبرِ انقلاب کی سرکاری ویب سائٹ KHAMENEI.IR سے منسوب کی جا رہی ہے، جس میں مشہد میں واقع روضۂ امام رضاؑ کے دارالذکر ہال کا منظر دکھایا گیا ہے۔ ویڈیو میں سفید سنگِ مرمر سے بنی سادہ طرز کی تربت، قرآنی آیات، ایرانی پرچم اور وہاں موجود زائرین کو دعا و فاتحہ خوانی کرتے دیکھا جا سکتا ہے۔
ویڈیو میں دکھایا گیا مقام آیت اللہ علی خامنہ ای اور ان کے ساتھ شہید ہونے والے اہلِ خانہ کی آخری آرام گاہ کے طور پر بیان کیا جا رہا ہے۔
یہ بھی پڑھیں: امریکی صدر کی ایک بار پرایران کو دھمکی
رپورٹس کے مطابق، آیت اللہ علی خامنہ ای کو ان کے آبائی شہر مشہد میں روضۂ امام رضاؑ کے احاطے میں سپردِ خاک کیا گیا، جبکہ تدفین سے قبل مختلف شہروں میں تعزیتی اجتماعات، نمازِ جنازہ اور یادگاری تقریبات بھی منعقد کی گئیں۔
منظرِ عام پر آنے والی اس ویڈیو نے سوشل میڈیا پر خاصی توجہ حاصل کی ہے، جہاں متعدد صارفین اسے اپنے جذبات اور عقیدت کے اظہار کے ساتھ شیئر کر رہے ہیں۔
