لاہور( پاک ترک نیوز) ’اسپائیڈر مین‘ نے باکس آفس پر دھوم مچا دی، چند ہی دنوں میں شاندار ریکارڈ قائم کردیا ۔
مارول کی نئی سپر ہیرو فلم ’اسپائیڈر مین: برانڈ نیو ڈے‘ نے ریلیز کے ابتدائی دنوں ہی میں عالمی باکس آفس پر غیر معمولی کامیابی حاصل کرتے ہوئے فلمی دنیا میں نئی بحث چھیڑ دی ہے۔
فلم نے شمالی امریکا اور بین الاقوامی مارکیٹس میں زبردست آغاز کیا، جہاں شائقین کی بڑی تعداد نے سینما گھروں کا رخ کیا۔ فلم کی کمائی میں مسلسل اضافے کے بعد اسے حالیہ برسوں کی کامیاب ترین اوپننگز میں شمار کیا جا رہا ہے۔
ماہرین کے مطابق فلم نے چند ہی دنوں میں عالمی سطح پر ایک ارب ڈالر سے زائد کا بزنس کرکے باکس آفس کی تاریخ میں تیز ترین کامیاب فلموں کی فہرست میں نمایاں مقام حاصل کر لیا ہے، تاہم یہ اب بھی تاریخ کی سب سے زیادہ کمائی کرنے والی فلم نہیں بنی۔
فلم کی ہدایت کاری ڈیسٹن ڈینیئل کریٹن نے کی ہے، جبکہ مرکزی کردار میں ٹام ہالینڈ ایک بار پھر پیٹر پارکر کے روپ میں نظر آ رہے ہیں۔ ان کے ساتھ زینڈایا، جیکب بیٹلون، سیڈی سنک، مارک رفالو اور جان برنتھل نے بھی اہم کردار ادا کیے ہیں۔
یہ بھی پڑھیں: فرانس کا بھارت کو رافیل کے حساس سورس کوڈز کی فراہمی سےپھر انکار
کہانی ایک ایسے مرحلے سے شروع ہوتی ہے جہاں پیٹر پارکر اپنی شناخت کے بحران، نئے خطرات اور طاقتور دشمنوں کا سامنا کرتا ہے، جبکہ ایکشن، جذبات اور جدید بصری اثرات نے فلم کو شائقین میں بے حد مقبول بنا دیا ہے۔
فلمی تجزیہ کاروں کا کہنا ہے کہ اگر یہی رفتار برقرار رہی تو ’اسپائیڈر مین: برانڈ نیو ڈے‘ رواں سال کی سب سے زیادہ کمائی کرنے والی فلموں میں شامل ہو سکتی ہے اور کئی مزید باکس آفس ریکارڈز اپنے نام کر سکتی ہے۔
