ہالی وڈ(پاک ترک نیوز)ہالی وڈ اداکار اور ہدایت کار بین ایفلک کی نئی سنسنی خیز فلم ’’اینیملز‘‘ ریلیز ہو گئی ہے، جس میں ایک بچے کے اغوا، تاوان کی رقم اور میاں بیوی کے درمیان بگڑتے تعلقات کی کہانی پیش کی گئی ہے۔ فلم میں بین ایفلک نے اداکاری کے ساتھ ہدایت کاری، کہانی نویسی اور فلم سازی کی ذمہ داریاں بھی نبھائی ہیں۔
فلم کی کہانی لاس اینجلس کے میئر کے امیدوار مارک کمبال کے گرد گھومتی ہے، جس کا کردار بین ایفلک نے ادا کیا ہے۔ مارک اور اس کی اہلیہ ایبیگیل، جس کا کردار کیری واشنگٹن نے نبھایا ہے، اس وقت شدید بحران کا شکار ہو جاتے ہیں جب ان کا بیٹا اغوا کر لیا جاتا ہے۔
اپنے بیٹے کی رہائی کے لیے تاوان کی رقم جمع کرنے کی کوشش میں دونوں کو مشکل فیصلوں کا سامنا کرنا پڑتا ہے، جبکہ ماضی کے ایسے راز بھی سامنے آنے لگتے ہیں جو ان کی زندگی تباہ کر سکتے ہیں۔ فلم میں اغوا کی سنسنی خیز کہانی کے ساتھ ازدواجی تعلقات، اخلاقی کشمکش اور شدید دباؤ میں انسانی رویوں کو بھی موضوع بنایا گیا ہے۔
فلم میں اداکاری کرنے والے لوئس جیرارڈو مینڈیز نے بین ایفلک کی ہدایت کاری کو سراہتے ہوئے کہا کہ وہ ایک پراعتماد ہدایت کار ہیں اور انہیں بخوبی معلوم ہوتا ہے کہ وہ کسی منظر سے کیا حاصل کرنا چاہتے ہیں۔
یہ بھی پڑھیں :وزیراعظم کی ذیابیطس سے بچاؤ کے لیے قومی حکمتِ عملی بنانے کی ہدایت، نوجوانوں میں آگاہی بڑھانے پر زور
مینڈیز کے مطابق فلم کے ایک جذباتی منظر کی عکس بندی کے دوران بین ایفلک نے پہلے ہی منظر کو مکمل قرار دے دیا، جبکہ اداکار مزید عکس بندی کرنا چاہتے تھے۔ ان کے بقول، کسی ہدایت کار کا اپنی تخلیقی سوچ اور فیصلے پر اس قدر اعتماد رکھنا غیر معمولی بات ہے۔
