اسلام آباد(پاک ترک نیوز) آل پاکستان گڈز ٹرانسپورٹ اتحاد کے صدر ملک شہزاد اعوان نے اسلام آباد اور راولپنڈی میں مال بردار گاڑیوں اور کنٹینرز کی پکڑ دھکڑ پر شدید تحفظات کا اظہار کرتے ہوئے حکومت سے تمام گاڑیاں فوری طور پر چھوڑنے کا مطالبہ کردیا۔ملک شہزاد اعوان کے مطابق سیاسی جماعتوں کے مجوزہ احتجاج کے پیش نظر اسلام آباد اور راولپنڈی میں پولیس نے تقریباً سات سو گاڑیوں اور کنٹینرز کو تحویل میں لیا ہے۔ان کا کہنا ہے کہ ان کنٹینرز میں لاکھوں اور کروڑوں روپے مالیت کا سامان موجود ہے، جس میں کھانے پینے کی اشیا کے علاوہ مختلف صنعتوں کے لیے ضروری سامان بھی شامل ہے۔
ملک شہزاد اعوان نے مؤقف اختیار کیا کہ گاڑیوں کو طویل عرصے تک کھڑا رکھنے سے نہ صرف ٹرانسپورٹرز کو مالی نقصان ہوگا بلکہ کنٹینرز میں موجود سامان خراب ہونے کا بھی خدشہ ہے۔یہ معاملہ ایسے وقت میں سامنے آیا ہے جب اسلام آباد میں مختلف سیاسی جماعتوں کے احتجاج اور مارچ کے اعلانات کے بعد انتظامیہ نے اہم شاہراہوں اور داخلی و خارجی راستوں پر بڑی تعداد میں کنٹینرز پہنچانا شروع کیے ہیں۔دوسری جانب آل پاکستان گڈز ٹرانسپورٹ اونرز ایسوسی ایشن کے صدر محمد اویس چوہدری نے بھی کنٹینرز کی پکڑ دھکڑ پر احتجاج کرتے ہوئے دعویٰ کیا ہے کہ ایک ہزار سے زائد کنٹینرز متاثر ہوئے ہیں اور ان میں موجود کروڑوں روپے کے سامان کے خراب ہونے کا خدشہ ہے۔
یہ بھی پڑھیں: ویمنز ایشیا گیمز ،پاکستان نے تھائی لینڈ کو شکست دیدی
ملک شہزاد اعوان نے پنجاب اور وفاقی حکومت سے مطالبہ کیا ہے کہ پکڑے گئے کنٹینرز اور مال بردار گاڑیوں کو فوری طور پر رہا کیا جائے۔ان کا کہنا تھا کہ اگر گاڑیاں اور کنٹینرز فوری طور پر نہ چھوڑے گئے تو ٹرانسپورٹرز کی جانب سے سخت لائحہ عمل کا اعلان کیا جائے گا۔
