لاہور( پاک ترک نیوز) سندل ایکسپریس کو 8 سال کی معطلی کے بعد دوبارہ بحال کردیا گیا، جس سے سرگودھا اور ملتان کے درمیان ریلوے رابطہ بحال ہوگیا ہے۔ٹرین کی بحالی سے جھنگ سمیت روٹ پر واقع دیگر اضلاع کے مسافروں کو سستے اور آسان سفری سہولت میسر آگئی ہے۔
سندل ایکسپریس کی بحالی کے موقع پر جھنگ اور سرگودھا ریلوے اسٹیشنز پر تقریبات منعقد ہوئیں، جہاں بڑی تعداد میں شہریوں نے ٹرین کا استقبال کیا۔وفاقی وزیر ریلوے محمد حنیف عباسی نے کہا کہ سندل ایکسپریس کی بحالی حکومت کے عوامی خدمت کے عزم کی عکاسی کرتی ہے۔ معطل ریلوے سروسز کی بحالی وسیع تر منصوبے کا حصہ ہے، جس کا مقصد سفری رابطوں کو بہتر بنانا اور عوام کو بہتر سہولیات فراہم کرنا ہے۔
یہ بھی پڑھیں: لاہور ہائیکورٹ کا گھریلو بجلی کنکشن منقطع کرنے کے خلاف اہم فیصلہ
وفاقی وزیر نے تقریب کے دوران اپ گریڈ کیے گئے جھنگ ریلوے اسٹیشن کا بھی افتتاح کیا۔جھنگ ریلوے اسٹیشن کی اپ گریڈیشن کے لیے ریڈ کریسنٹ ہسپتال جھنگ کے ایڈمنسٹریٹر اور کاروباری شخصیت ڈاکٹر معظم وحید شیخ نے اپنی جانب سے مالی تعاون فراہم کیا، جس کا مقصد شہر میں عوامی سہولیات کو بہتر بنانا ہے۔
