لاہور (پاک ترک نیوز )پنجاب کی وزیر اعلیٰ مریم نواز شریف نے سرگودھا ضلع میں سڑکوں کی تعمیر، بحالی اور بہتری کے لیے تقریباً ایک ارب روپے کے 8 منصوبوں کی منظوری دے دی۔
ڈپٹی کمشنر آفس کے مطابق یہ منصوبے اون سورس ریونیو انیشی ایٹو کے تحت مکمل کیے جائیں گے۔
منصوبوں میں ڈیری روڈ، آزاد روڈ، نیو اردو بازار روڈ، گرین مارکیٹ روڈ، پائلٹ اسکول روڈ اور آرا مارکیٹ روڈ کی تعمیر و بحالی شامل ہے، جس پر 17 کروڑ 57 لاکھ 90 ہزار روپے خرچ ہوں گے۔
خیام چوک اوور ہیڈ برج کی بحالی کے لیے 8 کروڑ 89 لاکھ 81 ہزار روپے مختص کیے گئے ہیں، جبکہ جوہر کالونی روڈ سے فاطمہ جناح روڈ، گل والا ریلوے کراسنگ اور ہری پورہ پل تک سڑک کی بحالی پر 22 کروڑ 86 لاکھ 74 ہزار روپے لاگت آئے گی۔
شما چوک سے اسٹیڈیم گیٹ روڈ اور چیما ہارٹ سینٹر تک لنک روڈ کی بحالی کے لیے 16 کروڑ 46 لاکھ 45 ہزار روپے، جبکہ مین بازار بھگتانوالہ روڈ اور لاہور روڈ، بھیرووال، کوٹ مومن لنک روڈ کے لیے 12 کروڑ 77 لاکھ 15 ہزار روپے منظور کیے گئے ہیں۔
شاہپور میں جیل روڈ سے شاہپور صدر روڈ کی بحالی کے لیے 9 کروڑ 88 لاکھ 88 ہزار روپے اور فاروکا روڈ سے سیال دھولکا روڈ کے لیے 5 کروڑ 66 لاکھ 84 ہزار روپے مختص کیے گئے ہیں۔
اس کے علاوہ سیال موڑ روڈ پر انٹرچینجز کی خوبصورتی کے لیے 6 کروڑ روپے کا منصوبہ بھی پروگرام میں شامل ہے۔
ڈپٹی کمشنر سرگودھا حسین احمد رضا چوہدری کے مطابق منصوبوں سے ضلع میں سڑکوں کا بنیادی ڈھانچہ بہتر ہوگا، ٹریفک کی روانی میں بہتری آئے گی اور شہری و دیہی علاقوں کے عوام کو آمدورفت کی بہتر سہولیات میسر ہوں گی۔
