پاکستان میں ایرانی طیاروں کی منتقلی کی رپورٹس مسترد

اسلام آباد ( پاک ترک نیوز) پاکستان میں ایرانی طیاروں کی منتقلی کی رپورٹس مسترد ۔پاکستانی دفتر خارجہ نے امریکی نشریاتی ادارے سی بی ایس نیوز کی رپورٹ کو بے بنیاد قرار دے دیا گیا ،ترجمان دفتر خارجہ کا کہناہے سی بی ایس نیوز کی رپورٹ میں نور خان ایئربیس پرایرانی طیاروں کی موجودگی سے متعلق گمراہ کن اور سنسنی خیز دعوے کیے گئے، ایسی قیاس آرائی پر مبنی بیانیے کا مقصد علاقائی استحکام اور امن کے لیے جاری کوششوں کو نقصان پہنچانا ہے۔
ترجمان دفتر خارجہ کا کہناہے جنگ بندی کے بعد اور اسلام آباد مذاکرات کے ابتدائی دور کے دوران، ایران اور امریکا سے متعدد طیارے پاکستان پہنچے تاکہ مذاکراتی عمل سے منسلک سفارتی عملے، سکیورٹی ٹیموں اور انتظامی عملے کی نقل و حرکت میں سہولت فراہم کی جا سکے۔
ترجمان دفتر خارجہ کے مطابق اس وقت پاکستان میں کھڑا ایرانی طیارہ جنگ بندی کی مدت کے دوران پہنچا اور اس کا کسی بھی فوجی ہنگامی صورتحال یا تحفظ کے انتظامات سے کوئی تعلق نہیں ہے۔پاکستان نے مذاکرات اور کشیدگی میں کمی کی حمایت میں مسلسل غیر جانبدار، تعمیری اور ذمہ دار سہولت کار کے طور پر کام کیا ہے۔ اس کردار کے مطابق، پاکستان نے تمام متعلقہ فریقوں کے ساتھ مکمل شفافیت اور باقاعدہ رابطے کو برقرار رکھتے ہوئے، ضرورت پڑنے پر معمول کی لاجسٹک اور انتظامی مدد فراہم کی ہے۔
پاکستان تمام مخلصانہ کوششوں کی حمایت کے لیے پرعزم ہے جن کا مقصد بات چیت کو فروغ دینا، تناؤ کو کم کرنا اور علاقائی اور عالمی امن، استحکام اور سلامتی کو آگے بڑھانا ہے۔