لاہور( پاک ترک نیوز) پنجاب کابینہ نے نئے مالی سال کے لئے بجٹ تجاویز کی منظوری دے دی ، آئندہ مالی سال کا بجٹ آج صوبائی اسمبلی میں پیش کیا جائے گا ۔ صوبائی بجٹ کا حجم 5 ہزار 131 ارب روپے رکھنے کی تجویز ہے ۔
یہ صوبے کی تاریخ میں اب تک کا سب سے بڑا بجٹ ہو گا ۔ تعلیم 900 ارب اور صحت 650 ارب روپے مختص کرنے کی تجویز ہے۔ طلبا کے لئے لیپ ٹاپ، الیکٹرک سکوٹیز اور ہونہار اسکالرشپ پروگرام آئندہ سال بھی جاری رہیں گے۔
وزیراعلیٰ پنجاب مریم نواز نے کہا پنجاب نے وفاقی حکومت کو سب سے زیادہ شیئر دیا ، شئیر کم ہونے کے باوجود اپنے عوام کو اپنے وسائل سے ریلیف دینے کے لئے پر عزم ہوں۔
وزیراعلیٰ پنجاب نے کہا عوام کے ریلیف اور خدمت کا سفر پہلے کی طرح جاری رہے گا۔ پنجاب کے عوام کی ترقی کے سفر پر کوئی کمپرومائز نہیں ہوگا۔ عوام کو ریلیف دینے کا عہد پورا کرنے کے لئے علالت کی حالت میں بھی ویڈیو لنک میٹنگ کرتی رہی۔
