لاہور( پاک ترک نیوز) پنجاب میں موسم گرما کی تعطیلات ختم ہونے کا اعلان۔۔۔ صوبے بھر کے اسکول 24 اگست سے دوبارہ کھل جائیں گے، وزیر تعلیم پنجاب نے اسکول کھولنے سے پہلے صفائی، سیکیورٹی اور دیگر انتظامات مکمل کرنے کی ہدایت کردی۔
وزیر تعلیم پنجاب رانا سکندر حیات نے متعلقہ حکام کو ہدایت کی ہے کہ اسکول کھلنے سے قبل تمام ضروری انتظامات مکمل کیے جائیں۔
کلاس رومز، واش رومز، کھیل کے میدان اور اسکول کے دیگر مقامات کی مکمل صفائی یقینی بنانے کی ہدایت کی گئی ہے، جبکہ طلبہ کے لیے صاف اور محفوظ پینے کے پانی کی فراہمی بھی یقینی بنائی جائے گی۔
وزیر تعلیم نے اسکولوں میں پانی کی ٹینکیوں اور چھتوں کی صفائی اور جراثیم کشی کی بھی ہدایت کردی۔
مون سون کے پیش نظر نکاسی آب کے نظام کو چیک کرنے، ڈینگی سے بچاؤ کے ایس او پیز پر سختی سے عملدرآمد اور مچھروں کی افزائش کے ممکنہ مقامات ختم کرنے کی ہدایت کی گئی ہے۔
اسکولوں میں زیر تعمیر یا مرمتی کام والے علاقوں کو طلبہ سے محفوظ رکھنے کے لیے مناسب رکاوٹیں لگانے کی بھی ہدایت کی گئی ہے۔
اس کے علاوہ پنکھے، لائٹس، سوئچز، ساکٹس اور بجلی کی وائرنگ کی مکمل جانچ کرنے کا حکم دیا گیا ہے تاکہ طلبہ کو کسی بھی ممکنہ حادثے سے محفوظ رکھا جاسکے۔
وزیر تعلیم پنجاب نے تمام سرکاری اور نجی اسکولوں میں سیکیورٹی ایس او پیز پر سختی سے عملدرآمد یقینی بنانے کی ہدایت بھی کردی۔
یہ بھی پڑھیں: سندھ میں ایم ڈی کیٹ 2026 کا انعقاد 16 اگست کو ہوگا، امتحانی مراکز اور انتظامات کا اعلان
اسکول کھلنے سے قبل سی سی ٹی وی کیمروں سمیت دیگر سیکیورٹی آلات فعال کرنے کا حکم دیا گیا ہے۔
رانا سکندر حیات نے اسکول سربراہان کو دوبارہ تعلیمی سرگرمیاں شروع ہونے سے قبل حتمی معائنہ کرنے کی ہدایت کرتے ہوئے خبردار کیا ہے کہ غفلت، تاخیر یا حکومتی ہدایات پر عمل نہ کرنے کی صورت میں کارروائی کی جائے گی۔
