اسلام آباد ( پاک ترک نیوز) وزیر دفاع خواجہ آصف کا کہناہے بانی پی ٹی آئی قانونی عمل کے تحت قید ہیں ، ،پی ٹی آئی ارکان لیڈر کی رہائی کے لیے ہر فورم پر کوشش ضرور کریں ،ایوان کا تقدس پامال نہ کریں ہم نے مل کر ایوان کو مضبوط بنانا اور اس کا تقدس برقرار رکھنا ہے ۔
قومی اسمبلی میں خطاب کرتے ہوئے خواجہ آصف نے کہا ماضی میں تمام پارٹیوں کے لیڈر قید رہے،ہم نے مسئلے کو اجاگر کیا لیکن نظام کو خطرے میں نہیں ڈالا۔ تحریک انصاف کا رویہ درست نہیں ،پی ٹی آئی نے کسی قانون سازی میں حصہ نہیں لیا،قانون سازی کے عمل میں رخنہ ڈالنے کا کوئی جواز نہیں ہے۔
خواجہ آصف نے مزید کہا آزاد کشمیر میں پرتشدد مظاہروں کا کوئی جواز نہیں ،حیران ہوں اتنی نفرت کہاں سے آ گئی ۔ کشمیر کی نئی اسمبلی کو مہاجرین کی نشستوں کا فیصلہ کرنے دیں ۔
خواجہ آصف نے کہا کشمیر مہاجرین نے پاکستان کی سرزمین پر آنے کی قیمت ادا کی ، سوا دو لاکھ کشمیری پاکستان میں داخل ہوتے ہوئے شہید کیے گئے،ان کشمیریوں کے خون سے دریائے راوی اور چناب سرخ ہوگئے۔
وزیر دفاع نے مزید کہا پچیس لاکھ مہاجرین کو نظر انداز نہیں کیا جا سکتا،مہاجرین کو ان کی نشستوں سے کیسے محروم کیا جا سکتا ہے ۔ کشمیر کے لیے دی گئی قربانیاں رائیگاں نہیں جانے دیں گے۔،تمام کشمیریوں کا احترام کرتا ہوں ،اللہ کرے پورا کشمیر آزاد ہو۔
