اسلام آباد (پاک ترک نیوز )چیئرمین تحریک انصاف بیرسٹر گوہر نے وزیر اعلیٰ خیبر پختونخوا سہیل آفریدی کے حوالے سے چلنے والی خبروں کی سختی سے تردید کردی۔
بیرسٹر گوہر کا کہنا ہے کہ بانی پی ٹی آئی نے کبھی سہیل آفریدی کے خلاف کوئی پیغام نہیں بھیجا اور نہ ہی انہیں عہدے سے ہٹانے کی ہدایت کی ہے۔
انہوں نے واضح کیا کہ سہیل آفریدی کو بانی پی ٹی آئی کا مکمل اعتماد حاصل ہے اور تحریک انصاف بھی وزیر اعلیٰ خیبر پختونخوا کی مکمل حمایت کرے گی۔
بیرسٹر گوہر نے کہا کہ ایسے وقت میں اس طرح کی خبریں چلانا نامناسب طرز عمل ہے، سب کو سمجھنا ہوگا کہ یہ حالات خراب کرنے کا وقت نہیں۔
ان کا کہنا تھا کہ موجودہ صورتحال میں سب کو ملک کے حالات بہتر بنانے کی کوشش کرنی چاہیے، جبکہ پی ٹی آئی کی جانب سے بھی معاملات کو مزید خراب ہونے سے بچانے کی کوششیں کی جارہی ہیں۔
