ممبئی (پاک ترک نیوز )بالی ووڈ اداکار عمران خان نے بھارت چھوڑنے کے حکم کو عدالت میں چیلنج کرنے کا فیصلہ کرلیا۔
بھارتی حکام نے اداکار کو غیر ملکی شہریت اور قوانین کی مبینہ خلاف ورزی کا حوالہ دیتے ہوئے ملک چھوڑنے کا نوٹس جاری کیا تھا۔
اطلاعات کے مطابق عمران خان نے حال ہی میں ممبئی کے اگست کرانتی میدان میں ایک عوامی احتجاج میں شرکت کی تھی، جس کے بعد حکام نے ان کی سیاسی سرگرمیوں پر اعتراض اٹھایا۔
حکام کا مؤقف ہے کہ امریکی شہری اور بیرونِ ملک بھارتی شہریت کے کارڈ کے حامل ہونے کے باعث عمران خان مقامی احتجاجی اور سیاسی سرگرمیوں میں حصہ نہیں لے سکتے۔
دوسری جانب اداکار کی قانونی ٹیم کا کہنا ہے کہ متعلقہ قوانین کے تحت احتجاج میں شرکت کو غیر قانونی قرار نہیں دیا جا سکتا۔
پولیس اور امیگریشن حکام کی جانب سے جاری نوٹس میں عمران خان کو 28 اکتوبر تک بھارت چھوڑنے کی ہدایت کی گئی ہے۔ اداکار کے وکلا نے اس فیصلے کے خلاف ممبئی ہائی کورٹ سے رجوع کرنے کا فیصلہ کیا ہے۔
