اسلام آباد ( پاک ترک نیوز) پٹرول کی قیمتوں سے پریشان پرانی موٹر سائیکلوں اور رکشوں کے ڈرائیورں کی بھی سنی گئی ۔اب 20 سال پرانی موٹر سائیکل بھی وزیراعظم فیول ریلیف اسکیم سے فائدہ اٹھا سکے گی۔وزیراعظم شہباز شریف نے فیول ریلیف اسکیم کا دائرہ کار مزید بڑھانے کی ہدایت کردی ہے۔حکومت کے تازہ فیصلے کے مطابق یکم جنوری 2006ء کے بعد رجسٹرڈ موٹر سائیکلیں، رکشے اور چنگ چی رکشے بھی اب اسکیم میں رجسٹریشن کے اہل ہوں گے۔
یعنی جس شہری کے پاس کئی سال پرانی موٹر سائیکل ہے اور وہ اب تک اس اسکیم سے باہر تھا، اس کے لیے بھی ریلیف کا راستہ کھول دیا گیا ہے۔اسی طرح پرانے رکشے اور چنگ چی چلانے والے افراد بھی فیول ریلیف حاصل کرسکیں گے۔وزیراعظم نے متعلقہ حکام کو نئی کیٹیگریز کو فوری طور پر اسکیم میں شامل کرنے کی ہدایت کی ہے۔موجودہ اسکیم کے تحت موٹر سائیکلوں، رکشوں اور چنگ چی سمیت دو اور تین پہیوں والی گاڑیوں کے لیے پٹرول پر 100 روپے فی لیٹر ریلیف مقرر کیا گیا ہے، جبکہ ماہانہ زیادہ سے زیادہ 20 لیٹر پر یہ ریلیف دیا جاتا ہے۔
یہ بھی پڑھیں: سربراہ پاک بحریہ کا بحری مشق سی اسپارک کا جائزہ
یعنی مکمل ماہانہ کوٹہ استعمال کرنے والے اہل صارف کو پٹرول پر مجموعی طور پر 2 ہزار روپے تک ریلیف مل سکتا ہے۔اور اب اس سہولت کا دائرہ ان گاڑیوں تک بھی بڑھایا جا رہا ہے جو 2006ء سے رجسٹرڈ ہیں۔حکومت کے مطابق اسکیم کا مقصد پٹرول کی بڑھتی قیمتوں کے اثرات سے عام آدمی کو ریلیف دینا ہے۔
رجسٹریشن کے لیے حکومت نے ایس ایم ایس کا طریقہ بھی متعارف کرایا ہے۔اہل شہریوں کو رجسٹریشن کے لیے 9771 پر مخصوص فارمیٹ میں ایس ایم ایس بھیجنا ہوتا ہے، جبکہ حکومت کے مطابق رجسٹریشن کا ایس ایم ایس اب مفت کردیا گیا ہے۔رجسٹریشن کے لیے شناختی کارڈ نمبر، گاڑی کا نمبر، رجسٹریشن کا صوبہ اور گاڑی کی رجسٹریشن کی تاریخ درکار ہوتی ہے۔
