اسلام آباد ( پاک ترک نیوز) وزیراعظم کے مشیر برائے سیاسی امور رانا ثناء اللہ نے کہا ہے کہ آزاد جموں و کشمیر قانون ساز اسمبلی کے انتخابات میں پاکستان مسلم لیگ (ن) کو سادہ اکثریت حاصل ہو گئی ہے اور 45 نشستوں میں سے 23 پر کامیابی ملی ہے۔
اسلام آباد میں نیوز کانفرنس کرتے ہوئے رانا ثناء اللہ نے کہا کہ آزاد کشمیر میں عوامی مینڈیٹ کے مطابق حکومت قائم ہوگی، جبکہ باقی 10 نشستوں پر تیسرے مرحلے میں انتخابات ہوں گے۔
انہوں نے کہا کہ کشمیری عوام نے میاں نواز شریف کے وژن پر اعتماد کا اظہار کیا ہے اور ان سے کیے گئے تمام وعدے پورے کیے جائیں گے۔ ان کا کہنا تھا کہ مسلم لیگ (ن) کی حکومت کے قیام کے بعد آزاد کشمیر میں ترقی اور خوشحالی کا نیا دور شروع ہوگا۔
رانا ثناء اللہ نے پاکستان پیپلز پارٹی کو تنقید کا نشانہ بناتے ہوئے کہا کہ میرپور میں شکست کے بعد دھاندلی کا بے بنیاد شور مچایا جا رہا ہے۔ انہوں نے دعویٰ کیا کہ پیپلز پارٹی نے انتخابی عمل مکمل ہونے سے پہلے ہی دھاندلی کے الزامات عائد کرنا شروع کر دیے تھے۔
انہوں نے کہا کہ پہلے 13 پولنگ اسٹیشنز پر دھاندلی کا دعویٰ کیا گیا، پھر یہ تعداد 4 اور بعد ازاں صرف 2 پولنگ اسٹیشنز تک محدود ہوگئی، جس سے ان الزامات کی حقیقت واضح ہو جاتی ہے۔
رانا ثناء اللہ نے الزام عائد کیا کہ پیپلز پارٹی نے دو روز قبل ایکشن کمیٹی کے ساتھ مل کر ہنگامہ آرائی کرائی، جبکہ چوہدری لطیف اکبر پر قاتلانہ حملے کا دعویٰ بھی حقیقت کے منافی تھا۔ انہوں نے کہا کہ محض دھکم پیل یا گالم گلوچ کو قاتلانہ حملہ قرار نہیں دیا جا سکتا۔
یہ بھی پڑھیں: آزاد کشمیر الیکشن ،ن لیگ 2سیٹوں پر کامیاب،10 پر آگے
رانا ثناء اللہ نے مزید کہا کہ حلقہ ایل اے 27 میں بھی پیپلز پارٹی کامیاب نہیں ہوگی۔
وزیراعظم کے مشیر نے کامیاب امیدواروں کو وزیراعظم شہباز شریف، مسلم لیگ (ن) کے صدر نواز شریف اور وزیراعلیٰ پنجاب مریم نواز کی جانب سے مبارکباد دیتے ہوئے کہا کہ انتخابی وعدوں کے مطابق آزاد کشمیر میں ترقیاتی منصوبوں پر جلد عملدرآمد شروع کیا جائے گا۔
