پشاور ( پاک ترک نیوز) پشاور میں گورنر ہاؤس میں پاکستان کے 79ویں یومِ آزادی کے موقع پر پروقار پرچم کشائی کی تقریب منعقد ہوئی۔ گورنر خیبرپختونخوا فیصل کریم کنڈی نے قومی پرچم لہرایا اور قوم کو یومِ آزادی کی مبارکباد پیش کی۔
میڈیا سے گفتگو کرتے ہوئے گورنر فیصل کریم کنڈی نے کہا کہ تمام اہلِ وطن کو جشنِ آزادی کی دلی مبارکباد پیش کرتا ہوں۔ اللہ تعالیٰ کا شکر ہے کہ ہم ایک آزاد ملک میں آزادی کے ساتھ سانس لے رہے ہیں۔
گورنر خیبرپختونخوا نے کہا کہ گزشتہ شب صدر آصف علی زرداری نے اسلام آباد میں یادگارِ فتح کا افتتاح کیا۔ تقریب میں وزیراعظم شہباز شریف، فیلڈ مارشل عاصم منیر، مسلح افواج کے سربراہان اور مختلف ممالک کے سفرا نے شرکت کی۔
فیصل کریم کنڈی نے کہا کہ ہم ان عظیم شہداء کو سلام پیش کرتے ہیں جنہوں نے وطن کی مٹی اور اس کی سلامتی کے لیے اپنی جانوں کا نذرانہ پیش کیا۔ پاک فوج، ایف سی، پولیس اور تمام سیکیورٹی فورسز کے افسران و جوانوں کو بھی خراجِ تحسین پیش کرتے ہیں جنہوں نے صوبے اور ملک کے لیے قربانیاں دیں۔
انہوں نے کہا کہ صوبے کے امن، سلامتی اور خوشحالی کے لیے ہم اپنی سیکیورٹی فورسز کے ساتھ متحد اور کھڑے ہیں۔
گورنر خیبرپختونخوا نے کہا کہ ایران، امریکا تنازع کے دوران پاکستان نے مثبت اور ذمہ دارانہ کردار ادا کیا، جسے عالمی سطح پر قدر کی نگاہ سے دیکھا گیا۔ خطے میں امن کے قیام کے لیے وزیراعظم، فیلڈ مارشل، نائب وزیراعظم اور وزیر داخلہ نے اہم کردار ادا کیا۔
یہ بھی پڑھیں: لاہور میں پولیس کی ٹارگٹ کلنگ، سب انسپکٹر اور ہیڈ کانسٹیبل کے قتل کا مقدمہ درج
فیصل کریم کنڈی نے کہا کہ دعا ہے پاکستان ہمیشہ امن کا گہوارہ رہے اور ترقی و خوشحالی کی نئی منازل طے کرے۔ ہم سب کو متحد ہو کر پاکستان کی ترقی، خوشحالی اور استحکام کے لیے اپنا کردار ادا کرنا ہوگا۔
