اسلام آباد ( پاک ترک نیوز) وزیراعظم شہباز شریف نے پاکستان اور بیرونِ ملک مقیم تمام اہلِ وطن کو 79ویں یومِ آزادی کی مبارکباد پیش کرتے ہوئے کہا ہے کہ پاکستان کی آزادی کے 79 سال مکمل ہونا پوری قوم کے لیے باعثِ مسرت اور فخر ہے۔
وزیراعظم نے قائداعظم محمد علی جناح، علامہ محمد اقبال اور تحریکِ آزادی کے تمام رہنماؤں کو خراجِ عقیدت پیش کرتے ہوئے کہا کہ ہمارے آباؤ اجداد کی لازوال قربانیوں اور جدوجہد کے نتیجے میں آزاد مملکت کا خواب شرمندۂ تعبیر ہوا۔
شہباز شریف نے کہا کہ پاکستان تمام شہریوں کو بلا تفریق رنگ و نسل مکمل آزادی کی ضمانت دیتا ہے، جبکہ آئین اور قوانین پاکستان تمام شہریوں کے حقوق کے ضامن ہیں۔
انہوں نے کہا کہ پاکستانی عوام نے زندگی کے ہر شعبے میں اپنی صلاحیتوں کا لوہا منوایا اور کامیابیاں حاصل کیں۔ نوجوان، ہنرمند افرادی قوت، کسان اور محنت کش پاکستان کے تابناک مستقبل کے ضامن ہیں۔
وزیراعظم نے کہا کہ حکومت نے گزشتہ ڈھائی برس کے دوران مشکل مراحل عبور کرتے ہوئے مستحکم معیشت کا ہدف حاصل کیا۔ پاکستان اب ترقی یافتہ معیشت کی منزل کی جانب کامیابی سے گامزن ہے۔
شہباز شریف کے مطابق گزشتہ دو برس میں بیرونِ ملک پاکستانیوں کی ترسیلاتِ زر میں 11.3 ارب ڈالر کا اضافہ ہوا۔ جدید آئی ٹی، صنعتی و زرعی ترقی اور عوامی فلاح حکومت کی اولین ترجیحات میں شامل ہیں۔
وزیراعظم نے پاک فوج کو خراجِ تحسین پیش کرتے ہوئے کہا کہ بہادر مسلح افواج نے دشمن کے ہر وار کا بھرپور جواب دے کر دفاعِ وطن کو ناقابلِ تسخیر ثابت کیا۔ معرکۂ حق میں مسلح افواج نے اتحاد، عزم اور بے مثال بہادری کا مظاہرہ کیا۔
یہ بھی پڑھیں: لاہور میں پولیس کی ٹارگٹ کلنگ، سب انسپکٹر اور ہیڈ کانسٹیبل کے قتل کا مقدمہ درج
شہباز شریف نے کہا کہ پاکستان اپنے دفاع اور قومی مفادات کے تحفظ کے لیے کسی قربانی سے دریغ نہیں کرے گا۔ پاکستان اقوامِ عالم میں ایک مضبوط، پرعزم، باوقار اور امن کی توانا آواز ہے۔
وزیراعظم نے کہا کہ پاکستان خطے میں امن، استحکام اور علاقائی تعاون کے فروغ میں تعمیری کردار ادا کر رہا ہے۔ مکہ مکرمہ مشترکہ دفاعی معاہدہ پاکستان کے بڑھتے ہوئے تزویراتی کردار کا مظہر ہے۔
فلسطین اور کشمیر کے حوالے سے وزیراعظم نے کہا کہ پاکستان مظلوم فلسطینی عوام اور کشمیری بہن بھائیوں کے ساتھ مکمل یکجہتی کا اظہار کرتا ہے۔ جموں و کشمیر کا پائیدار حل اقوامِ متحدہ کی قراردادوں اور کشمیری عوام کی امنگوں کے مطابق ہونا چاہیے۔
وزیراعظم شہباز شریف نے یومِ آزادی کے موقع پر اس عزم کا اظہار کیا کہ حکومت اور قوم مل کر پاکستان کو ترقی، خوشحالی، امن اور استحکام کی نئی منزلوں تک پہنچائیں گے۔
