پشاور ( پاک ترک نیوز) خیبرپختونخوا میں بارشوں، تیز ہواؤں اور گرج چمک کے ساتھ موسم کی تبدیلی کا الرٹ جاری کردیا گیا۔ صوبائی ڈیزاسٹر مینجمنٹ اتھارٹی (پی ڈی ایم اے) کے مطابق 10 سے 14 نومبر تک صوبے کے بالائی اور میدانی علاقوں میں بارشوں کا امکان ہے۔پی ڈی ایم اے کے مطابق چترال، دیر، سوات، ملاکنڈ، کوہستان، مانسہرہ اور ایبٹ آباد سمیت مختلف اضلاع میں بارش اور ژالہ باری متوقع ہے، جبکہ پشاور، مردان، صوابی، نوشہرہ، چارسدہ اور کوہاٹ میں بھی بارش ہوسکتی ہے۔ بالائی پہاڑی علاقوں میں ہلکی برفباری کی پیشگوئی بھی کی گئی ہے۔
یہ بھی پڑھیں: صوابی میں بینک کے قریب فائرنگ، خاتون سمیت تین افراد جاں بحق، سات زخمی
بارشوں کے باعث پہاڑی علاقوں میں لینڈ سلائیڈنگ کا خدشہ ہے، جبکہ میدانی علاقوں میں بارش کے بعد بعض مقامات پر دھند چھانے کا امکان ہے۔ موسم کی تبدیلی سے دن کے درجہ حرارت میں 2 سے 4 ڈگری سینٹی گریڈ کمی متوقع ہے۔پی ڈی ایم اے نے ضلعی انتظامیہ اور متعلقہ اداروں کو الرٹ رہنے، حساس مقامات، دریاؤں اور ندی نالوں کی نگرانی اور نکاسی آب کے نظام کو بہتر بنانے کی ہدایت کی ہے۔ ریسکیو 1122 کی ٹیموں کو بھی ہنگامی صورتحال سے نمٹنے کے لیے تیار رہنے کا حکم دیا گیا ہے۔ترجمان پی ڈی ایم اے نے سیاحوں اور مسافروں کو خراب موسم میں غیر ضروری سفر سے گریز اور احتیاطی تدابیر اختیار کرنے کی ہدایت کرتے ہوئے بتایا کہ ایمرجنسی آپریشن سینٹر مکمل طور پر فعال ہے۔ کسی بھی ناخوشگوار واقعے کی اطلاع ہیلپ لائن 1700 پر دی جاسکتی ہے۔
