اسلام آباد ( پاک ترک نیوز ) ملک بھر میں آج پاکستان کا 79 واں یومِ آزادی ملی جوش و جذبے کے ساتھ منایا جا رہا ہے۔ دن کا آغاز وفاقی دارالحکومت اور چاروں صوبائی دارالحکومتوں میں توپوں کی سلامی سے ہوا، جبکہ نمازِ فجر کے بعد ملکی ترقی، یکجہتی، امن اور خوشحالی کے لیے خصوصی دعائیں کی گئیں۔
جشنِ آزادی کے موقع پر وفاقی دارالحکومت اسلام آباد میں 31 توپوں جبکہ صوبائی دارالحکومتوں میں 21، 21 توپوں کی سلامی دی گئی۔ توپوں کی گھن گرج سے فضا اللہ اکبر کے نعروں سے گونج اٹھی۔
گلگت بلتستان اور آزاد کشمیر کے دارالحکومت مظفرآباد میں بھی پاک فوج کے دستوں نے توپوں کی سلامی پیش کی۔ نمازِ فجر کے بعد مساجد میں پاکستان کی سلامتی، ترقی، خوشحالی، امن اور قومی یکجہتی کے لیے خصوصی دعائیں کی گئیں۔
لاہور میں یومِ آزادی کے آغاز پر پاک فوج کی جانب سے 21 توپوں کی سلامی دی گئی، جبکہ نمازِ فجر کے بعد ملکی ترقی، یکجہتی، امن اور خوشحالی کے لیے خصوصی دعائیں بھی کی گئیں۔
کوئٹہ میں بھی یومِ آزادی کے موقع پر کینٹ میں دن کا آغاز 21 توپوں کی سلامی سے ہوا۔
دوسری جانب کراچی میں یومِ آزادی کے موقع پر مزارِ قائد پر گارڈز کی تبدیلی کی پروقار تقریب ہوئی۔ پاکستان نیول اکیڈمی کے چاق و چوبند کیڈٹس نے اعزازی گارڈز کے فرائض سنبھال لیے۔
یہ بھی پڑھیں: پاکستان میں ڈیجیٹل اثاثوں اور ٹوکنائزیشن کے استعمال پر غور
مزارِ قائد پر پاک بحریہ کے اعزازی گارڈز دو دستوں پر مشتمل ہیں، جن میں ایک دستہ پاک بحریہ کے سیلرز جبکہ دوسرا پاکستان نیول اکیڈمی کے کیڈٹس پر مشتمل ہے۔
تقریب کے مہمانِ خصوصی کمانڈنٹ پاکستان نیول اکیڈمی ریئر ایڈمرل محمد عمیر تھے، جبکہ تینوں مسلح افواج کے نمائندوں نے بھی مزارِ قائد پر حاضری دی اور بانیٔ پاکستان قائداعظم محمد علی جناح کو خراجِ عقیدت پیش کیا۔
