واشنگٹن (پاک ترک نیوز )عالمی ریٹنگ ایجنسی موڈیز نے پاکستان کی خودمختار کریڈٹ ریٹنگ میں اہم بہتری کرتے ہوئے اسے Caa1 سے بڑھا کر B3 کر دیا ہے، جبکہ پاکستان کی ریٹنگ کا آؤٹ لک مستحکم برقرار رکھا گیا ہے۔
موڈیز کی جانب سے ریٹنگ میں بہتری کو پاکستان کی معاشی اور مالیاتی صورتحال میں بتدریج استحکام کی علامت قرار دیا جا رہا ہے۔ کریڈٹ ریٹنگ میں یہ اپ گریڈ اس بات کی عکاسی کرتا ہے کہ عالمی سطح پر پاکستان کی معیشت اور قرضوں کی ادائیگی کی صلاحیت پر اعتماد میں اضافہ ہوا ہے۔
ماہرین کے مطابق B3 ریٹنگ پاکستان کی معاشی بحالی اور مالیاتی استحکام کی جانب ایک اہم پیش رفت ہے۔ ریٹنگ میں بہتری سے عالمی سرمایہ کاروں کے اعتماد میں اضافہ ہونے اور پاکستان کے لیے بین الاقوامی مالیاتی منڈیوں تک رسائی بہتر ہونے کی راہ بھی ہموار ہو سکتی ہے۔
موڈیز کا تازہ فیصلہ پاکستان کی بہتر ہوتی معاشی اور مالیاتی پوزیشن کا عالمی سطح پر ایک اہم اعتراف سمجھا جا رہا ہے۔
معاشی ماہرین کے مطابق اگر پاکستان مالیاتی نظم و ضبط برقرار رکھنے، زرمبادلہ کے ذخائر بہتر کرنے، قرضوں کی مؤثر ادائیگی اور معاشی اصلاحات کے عمل کو جاری رکھتا ہے تو مستقبل میں کریڈٹ ریٹنگ میں مزید بہتری کی گنجائش پیدا ہو سکتی ہے۔
