اسلام آباد ( پاک ترک نیوز) پاکستان میں الیکٹرک گاڑیوں اور جدید بیٹری ٹیکنالوجی کے شعبے میں بڑی پیش رفت کی امید پیدا ہو گئی۔ دنیا کی سب سے بڑی ای وی بیٹری ساز چینی کمپنی پاکستان میں سرمایہ کاری پر غور کرنے لگی پاکستان اور چین کے درمیان بیٹری مینوفیکچرنگ اور نئی توانائی کے منصوبوں پر اہم مذاکرات جاری ہیں ۔
چین میں پاکستان کے سفیر خالد ہاشمی نے کراچی چیمبر آف کامرس میں گفتگو کرتے ہوئے انکشاف کیا کہ پاکستان اس وقت CATL کے ساتھ جدید لیتھیئم آئن اور سوڈیم بیٹری ٹیکنالوجی میں تعاون پر بات چیت کر رہا ہے۔ سفیر کے مطابق وزیراعظم کے آئندہ دورۂ چین میں اس حوالے سے اہم پیش رفت متوقع ہے۔
سی پیک کے دوسرے مرحلے میں پاکستان صنعتی تعاون، ٹیکنالوجی ٹرانسفر اور مینوفیکچرنگ پر خصوصی توجہ دے رہا ہے۔ حکومت کی کوشش ہے کہ پاکستان کو خطے میں بیٹری مینوفیکچرنگ اور نئی توانائی کا اہم مرکز بنایا جائے۔
سفیر کا کہناہے دنیا بھر میں الیکٹرک گاڑیوں اور انرجی اسٹوریج سسٹمز کی مانگ میں تیزی سے اضافہ ہو رہا ہے۔۔۔ CATL اس وقت دنیا کی سب سے بڑی ای وی بیٹری کمپنی ہے جو ٹیسلا، بی ایم ڈبلیو، ووکس ویگن اور فورڈ جیسی عالمی کمپنیوں کو بیٹریاں فراہم کر رہی ہے۔
سفیر خالد ہاشمی کے مطابق پاکستان کے پاس سوڈیم بیٹری ٹیکنالوجی کے لیے درکار خام مال وافر مقدار میں موجود ہے۔۔ پاکستان اس شعبے میں “فرسٹ موور ایڈوانٹیج” حاصل کرنے کے لیے غیر ملکی سرمایہ کاری راغب کرنے پر کام کر رہا ہے۔
گزشتہ دو برسوں میں پاکستان اور چین کے درمیان 300 سے زائد مفاہمتی یادداشتوں اور درجنوں مشترکہ منصوبوں پر دستخط ہو چکے ہیں جن کی مجموعی مالیت 13 ارب ڈالر سے زائد ہے۔۔۔ حکام کے مطابق اب ان معاہدوں کو عملی کاروباری منصوبوں میں تبدیل کرنے پر توجہ دی جا رہی ہے۔
