ایکشن کمیٹی کا مطالبہ انتخابی عمل کو سبوتاژ کرنے کے مترادف قرار، خواجہ آصف کا سخت ردعمل
اسلام آباد (پاک ترک نیوز ) آزاد کشمیر میں ایکشن کمیٹی کا اہم مطالبہ حکومت نے مسترد کر دیا ،خواجہ آصف کا کہناہے ایکشن کمیٹی نے آزاد کشمیر اسمبلی کی پاکستان سے منتخب ہونے والی 12 نشستیں ختم کرنے کا مطالبہ کیا ہے جو قابل قبول نہیں
وزیر دفاع خواجہ آصف نے سوشل میڈیا پر بیان میں لکھا ایکشن کمیٹی کا اقدام انتخابی عمل کو سبوتاژ کرنے کے مترادف ہے۔اس سے جمہوری نظام متاثر ہو سکتا ہے۔
خواجہ آصف نے کہا ستائیس جولائی کو آزاد کشمیر کے انتخابات ہوں گے ،، الیکشن سے قبل ایکشن کمیٹی کا مہاجر نشستیں ختم کرنے کا مطالبہ انتخابی عمل سے پہلے کرنا جمہوری اصولوں کے خلاف ہے۔
خواجہ آصف نے کہا اگر کسی کو کوئی مؤقف یا اعتراض ہے تو اسے انتخابات کے دن عوام کے سامنے رکھا جائے تاکہ خلقِ خدا خود فیصلہ کرے کہ نمائندگی کی کیا شکل ہونی چاہیے۔ یہی اصل جمہوری طریقہ ہے، ورنہ ایسے مطالبات کو دباؤ یا بلیک میلنگ تصور کیا جائے گا۔
وزیر دفاع نے کہا سیالکوٹ شہر اور تحصیل سے آزاد کشمیر اسمبلی کی ایک مکمل نشست موجود ہے جبکہ پاکستان قومی اسمبلی کی دو نشستیں بھی اسی نظام کا حصہ ہیں۔ پاکستان کے مختلف علاقوں میں آزاد کشمیر اسمبلی کے حلقے موجود ہیں جہاں جموں سے تعلق رکھنے والے کشمیری مہاجرین بڑی تعداد میں آباد ہیں۔
اکتوبر 1947 میں لاکھوں مہاجرین نے اپنی جانوں اور عزتوں کی قربانیاں دے کر سیالکوٹ کا رخ کیا،ان لوگوں نے آزادی کی بھاری قیمت ادا کی اور کئی دہائیاں کسمپرسی میں گزاریں، اس لیے انہیں ان کے سیاسی اور آئینی حق سے محروم نہیں کیا جا سکتا۔
خواجہ آصف نے کہا کہ تمام سیاسی و آئینی اختلافات کو جمہوری طریقے سے حل کیا جانا چاہیے اور کسی بھی فریق کو ایسا راستہ اختیار نہیں کرنا چاہیے جو انتخابی عمل کو متاثر کرے۔
