کولمبو : (پاک ترک نیوز)پاکستان کو ٹی ٹونٹی ورلڈ کپ 2026ءکے سپر ایٹ مرحلے میں رسائی کیلئے نمیبیا کیخلاف لازمی فتح درکار ہے ۔
ٹی ٹونٹی ورلڈ کپ سر ایٹ مرحلے کی آخری ٹیم کا فیصلہ پاکستان اور نمیبیا کیخلاف میچ کے بعد ہو گا ۔شاہینوں کو اگلے مرحلے میں رسائی کیلئے لازمی میچ جتنا ہو گا ہار کی صورت میں امریکہ سپر ایٹ مرحلے کیلئے کوالیفائی کر جائے گا ۔
پاکستان اور نمیبیا کے درمیان کل میچ دوپہر اڑھائی بجے شروع ہو گا ۔موسم کی مداخلت کا بھی امکان ظاہر کیا جا رہا ہے ۔
گروپ اے میں انڈیا پہلے ہی سپر مرحلے میں پہنچ چکا ہے ۔ گروپ بی سے سری لنکا اور زمبابوے کی ٹیموں نے سپر ایٹ کیلئے کوالیفائی کیا ہے ۔ گروپ سی سے ویسٹ انڈیز اور انگلینڈ جبکہ گروپ ڈی سے سائوتھ افریقہ اور نیوزی لینڈ کی ٹیمیں سپر مرحلے میں پہنچ چکی ہیں ۔
سپر ایٹ مرحلے کا آغاز 21فروری سے ہو گا ۔واضح رہے کہ پاکستان نے اپنے اب تک میگا ایونٹ میں تین میچز کھیلے ہیں اس نے امریکہ اور نیدر لینڈز کو شکست دی تھی تاہم اسے روایتی حریف بھارت کے ہاتھوں شکست کا سامنا کرنا پڑا تھا جس کے بعد ٹیم پر شدید تنقید بھی کی جا رہی ہے۔
سابق کرکٹرز اور شائقین کی جانب سے سینئر کھلاڑیوں کو بٹھانے کا مطالبہ زور پکڑتا جا رہا ہے ۔ سابق کپتان شاہد آفریدی نے اپنے داماد شاہین شاہ آفریدی ، بابراعظم اور شاداب خان کی جگہ نئے کھلاڑیوں کو موقع دینے کا مشورہ دیا ہے ۔
یاد رہے کہ پاکستان کے تین میچز کھیل کر 4پوائنٹس ہیں دوسری جانب امریکہ کے 4میچز کے بعد 4پوائنٹس ہیں لیکن اس کا رن ریٹ پاکستان کی نسبت بہتر ہے ۔ پاکستان کی شکست کی صورت میں امریکہ سپر ایٹ کیلئے کوالیفائی کر سکتا ہے تاہم شاہین بھرپور جوش و جذبے کے ساتھ سپر ایٹ مرحلے میں جانے کیلئے ایڑی چوٹی کا زور لگائیں گے ۔
