کولمبو : (پاک ترک نیوز)آئی سی سی مینز ٹی 20 ورلڈ کپ 2026 میں پاکستان اور بھارت کے درمیان شیڈول بڑے مقابلے پر موسم کے سائے منڈلانے لگے ہیں۔
گروپ اے کا یہ ہائی پروفائل میچ 15 فروری کو کولمبو میں کھیلا جانا ہے، تاہم تازہ موسمی پیش گوئی نے شائقین کی دھڑکنیں تیز کر دی ہیں۔
موسمیاتی رپورٹس کے مطابق میچ کے اوقات کے دوران گرج چمک کے ساتھ بارش کا قوی امکان ظاہر کیا گیا ہے۔ دوپہر سے شام تک بارش کے امکانات 55 سے 60 فیصد تک پہنچ سکتے ہیں، جب کہ درجہ حرارت 31 ڈگری سینٹی گریڈ تک رہنے اور نمی کے تناسب میں اضافے کی پیش گوئی بھی کی گئی ہے۔
میچ کا آغاز جس وقت متوقع ہے، انہی اوقات میں بادل برسنے کا خدشہ زیادہ بتایا جا رہا ہے۔
ٹورنامنٹ کے موجودہ پوائنٹس سسٹم کے تحت اگر مقابلہ بارش کی نذر ہوگیا تو دونوں ٹیموں کو ایک، ایک پوائنٹ مل جائے گا۔
اس صورتحال کے پیش نظر دونوں ممالک کے مداح مسلسل موسم کی تازہ اپ ڈیٹس پر نظریں جمائے ہوئے ہیں تاکہ کرکٹ کا یہ روایتی معرکہ مکمل طور پر کھیلا جا سکے۔
یاد رہے کہ پاکستان اس وقت گروپ اے میں دو فتوحات کے ساتھ سرفہرست ہے، جبکہ بھارت ایک کامیابی کے بعد دوسرے نمبر پر موجود ہے۔ اس سے قبل پاکستان اور آئرلینڈ کا وارم اپ میچ بھی خراب موسم کے باعث مکمل نہ ہو سکا تھا، جس سے منتظمین کے لیے انتظامی چیلنجز مزید بڑھ گئے ہیں۔
چند روز قبل اس میچ کے انعقاد کے حوالے سے غیر یقینی صورتحال بھی پیدا ہوئی تھی، تاہم سرکاری سطح پر تصدیق کے بعد واضح کر دیا گیا کہ قومی ٹیم طے شدہ شیڈول کے مطابق میدان میں اترے گی۔ اب سب کی نظریں صرف موسم پر مرکوز ہیں کہ آیا بادل چھٹیں گے یا یہ بڑا مقابلہ متاثر ہو جائے گا۔
