پاکستان اور بحرین دو روحیں ، ایک دل ، مضبوط شراکت داری کو فروغ دینگے ، وزیراعظم

منامہ ( پاک ترک نیوز) وزیرِاعظم شہباز شریف نے بحرین میں شاندار استقبال اور مہمان نوازی پر بحرینی قیادت کا شکریہ ادا کرتے ہوئے کہا ہے کہ بحرین کی جانب سے ملنے والا تاریخی استقبال ہمیشہ یاد رکھا جائے گا۔
تفصیلات کے مطابق منامہ میں تقریب سے خطاب کرتے ہوئے شہباز شریف نے کہا کہ بحرین آ کر ایسا محسوس ہوتا ہے جیسے اپنے دوسرے گھر آئے ہوں۔
وزیرِاعظم شہباز شریف نے پاکستان اور بحرین کو ’’دو جسم نہیں بلکہ دو روحیں اور ایک دل‘‘ قرار دیتے ہوئے کہا کہ دونوں ممالک کے تعلقات کئی دہائیوں پر محیط اور باہمی احترام، ثقافت اور بھائی چارے کی بنیاد پر قائم ہیں۔
وزیراعظم نے کہا کہ دورۂ بحرین کا مقصد دوطرفہ تعلقات، بالخصوص معاشی شعبوں میں نئی پیشرفت اور مضبوط شراکت داری کو فروغ دینا ہے ، وزیراعظم نے بحرینی سرمایہ کاروں کو پاکستان میں سرمایہ کاری کی دعوت دی۔
شہباز شریف نے بتایا کہ بحرین میں مقیم پاکستانیوں نے گزشتہ مالی سال میں 484 ملین ڈالر کی ترسیلات بھیجیں، جس پر انہوں نے پاکستانی کمیونٹی کو خراجِ تحسین پیش کیا۔
وزیراعظم نے کہا کہ پاکستان جی سی سی کے ساتھ فری ٹریڈ معاہدے کو اہم سمجھتا ہے کیونکہ اس سے تجارتی تعلقات نئی بلندیوں تک پہنچیں گے۔
شہباز شریف نے اس امید کا اظہار کیا کہ پاکستان اور بحرین مل کر عظیم کامیابیاں حاصل کر سکتے ہیں، پاکستان بحرین کی ترقی سے سیکھنے اور آگے بڑھنے کے لیے پرعزم ہے۔