اسلام آباد (پاک ترک نیوز )پاکستان ٹیلی کمیونیکیشن اتھارٹی نے سائبر فراڈ اور موبائل صارفین کو دھوکا دہی سے بچانے کے لیے میٹا کے تعاون سے ایک لاکھ 76 ہزار واٹس ایپ اکاؤنٹس بند کرادیے۔
پی ٹی اے حکام کے مطابق یہ اکاؤنٹس ایسے موبائل نمبرز پر رجسٹرڈ تھے جو پہلے استعمال ہونے کے بعد منسوخ کیے گئے اور بعد ازاں دوبارہ نئے صارفین کو جاری کردیے گئے تھے۔
حکام کا کہنا ہے کہ پرانے نمبرز سے منسلک واٹس ایپ اکاؤنٹس کے ذریعے دھوکا دہی کی شکایات موصول ہونے پر یہ کارروائی کی گئی۔
پی ٹی اے نے ایسے تقریباً ایک کروڑ موبائل نمبرز کی تفصیلات تصدیق اور شناخت کے لیے میٹا کو فراہم کی ہیں، جبکہ نئے مستقل طریقہ کار کے تحت ہر ماہ 5 ہزار دوبارہ جاری کیے گئے نمبرز میٹا کے ساتھ شیئر کیے جائیں گے تاکہ ان سے منسلک واٹس ایپ اکاؤنٹس کی شناخت کرکے انہیں بند کیا جاسکے۔
پی ٹی اے حکام کے مطابق ٹیلی کام کمپنیوں کے پاس اس وقت تقریباً ایک کروڑ 60 لاکھ دوبارہ جاری کیے گئے موبائل نمبرز موجود ہیں۔
حکام کا کہنا ہے کہ جب کسی صارف کی سم بند ہونے کے بعد وہی نمبر کسی دوسرے شخص کو جاری کیا جاتا ہے تو اس نمبر سے منسلک پرانا واٹس ایپ اکاؤنٹ فعال رہنے کی صورت میں نئے صارف کو سکیورٹی خطرات لاحق ہوسکتے ہیں اور جعل ساز اس کا فائدہ اٹھا سکتے ہیں۔
اس مسئلے سے نمٹنے کے لیے پی ٹی اے اور میٹا کے درمیان طے پانے والے طریقہ کار کے تحت ایسے اکاؤنٹس کی مرحلہ وار نشاندہی اور بندش کی جائے گی۔
پی ٹی اے حکام نے مزید بتایا کہ گزشتہ سال اتھارٹی کی جانب سے میٹا کو بھجوائی گئی شکایات میں سے 82 فیصد شکایات کا ازالہ کیا گیا۔
