کراچی ( پاک ترک نیوز) سندھ میں میڈیکل اور ڈینٹل کالجوں میں داخلوں کے لیے ایم ڈی کیٹ 2026 کا انعقاد 16 اگست بروز اتوار کیا جائے گا۔ سیبا ٹیسٹنگ سروسز کے مطابق صوبے بھر میں امتحان کے لیے تمام انتظامات مکمل کر لیے گئے ہیں۔
سیبا ٹیسٹنگ سروسز کے مطابق ایم ڈی کیٹ کا امتحان کراچی، حیدرآباد، جامشورو، لاڑکانہ، سکھر، میرپورخاص، شہید بینظیرآباد اور اسلام آباد میں قائم امتحانی مراکز پر بیک وقت لیا جائے گا۔
کراچی میں امتحان این ای ڈی یونیورسٹی آف انجینئرنگ اینڈ ٹیکنالوجی، حیدرآباد میں پبلک اسکول لطیف آباد، جامشورو میں لیاقت یونیورسٹی آف میڈیکل اینڈ ہیلتھ سائنسز، میرپورخاص میں میر شیر محمد ٹالپور پبلک اسکول، لاڑکانہ میں پولیس ٹریننگ اسکول گراؤنڈ، واگن روڈ، شہید بینظیرآباد میں قائدِ عوام یونیورسٹی آف انجینئرنگ، سائنس اینڈ ٹیکنالوجی اور سکھر میں آئی بی اے پبلک اسکول، اولڈ ایئرپورٹ روڈ میں منعقد ہوگا۔
سیبا ٹیسٹنگ سروسز کے مطابق اسلام آباد منتقل ہونے والے سندھ کے رہائشی امیدواروں کے لیے امتحانی مرکز پاکستان نیشنل کونسل آف آرٹس میں قائم کیا گیا ہے۔
یہ بھی پڑھیں: پنجاب میں مزید 555 سرکاری اسکول بند یا ضم کرنے کا فیصلہ
حکام کا کہنا ہے کہ ایم ڈی کیٹ کا دورانیہ تین گھنٹے ہوگا اور تمام امیدواروں کو ہدایت کی گئی ہے کہ وہ مقررہ رپورٹنگ وقت پر امتحانی مراکز پہنچیں۔ امتحان مکمل ہونے سے قبل کسی بھی امیدوار کو امتحانی ہال سے باہر جانے کی اجازت نہیں دی جائے گی۔
سیبا ٹیسٹنگ سروسز کے مطابق امیدواروں کی سہولت کے لیے تمام امتحانی مراکز پر والدین کے لیے علیحدہ انتظار گاہیں قائم کی جائیں گی، جبکہ امتحانی ہال کے اندر امیدواروں کو ضروری اسٹیشنری اور صاف پینے کا پانی بھی فراہم کیا جائے گا تاکہ امتحان شفاف اور پرامن ماحول میں منعقد کیا جا سکے۔
