اسلام آباد (پاک ترک نیوز) قومی احتساب بیورو نے مولانا فضل الرحمان کے صاحبزادے اسعد محمود کو 10 نومبر کو طلب کر لیا ۔
نیب کی جانب سے پاکستان پوسٹ آفس میں مبینہ غیر قانونی بھرتیوں کے معاملے پر انکوائری جاری ہے۔نیب کے نوٹس کے مطابق پاکستان پوسٹ آفس میں 3 ہزار 938 منظور شدہ آسامیوں کے مقابلے میں 4 ہزار 252 افراد کو بھرتی کیا گیا۔ نوٹس میں الزام عائد کیا گیا ہے کہ ختم کی گئی 2 ہزار 646 آسامیوں پر بھی بھرتیاں کی گئیں۔
مبینہ غیر قانونی بھرتیوں میں جعلی دستاویزات کے استعمال، عمر کی مقررہ حد کی خلاف ورزی اور امیدواروں کے ڈومیسائل کوٹے کی پابندی نہ کرنے کے الزامات بھی شامل ہیں۔ نوٹس میں بھرتیوں کے دوران سیاسی وابستگیوں کو ترجیح دینے کا معاملہ بھی اٹھایا گیا ہے۔
یہ بھی پڑھیں: امریکی مڈٹرم انتخابات، ٹیکساس میں 30 سال بعد ڈیموکریٹس کی واپسی
نیب نے اسد محمود کو 10 نومبر کو صبح 11 بجے ذاتی حیثیت میں پیش ہونے کی ہدایت کی ہے۔ نوٹس کے مطابق عدم تعمیل کی صورت میں قومی احتساب آرڈیننس 1999 کی دفعہ 31 کے تحت کارروائی کی جا سکتی ہے۔
