ابوظہبی (پاک ترک نیوز)متحدہ عرب امارات نے آبنائے ہرمز کے متبادل کے طور پر تیسری خام تیل پائپ لائن بچھانے کے منصوبے پر غور شروع کردیا ہے، جس کا مقصد تیل کی برآمدات کو مزید محفوظ بنانا اور آبنائے ہرمز میں ممکنہ رکاوٹوں کے اثرات کم کرنا ہے۔
بلومبرگ کی رپورٹ کے مطابق ابوظبی کی سرکاری توانائی کمپنی ادنوک (ADNOC) متحدہ عرب امارات کے مغربی ساحل سے مشرقی ساحل پر واقع فجیرہ تک ایک نئی پائپ لائن بچھانے کے امکانات کا جائزہ لے رہی ہے۔
رپورٹ میں ذرائع کے حوالے سے بتایا گیا ہے کہ ادنوک نے ایشیائی صارفین کو بھی اس مجوزہ منصوبے سے آگاہ کیا ہے، تاہم ابھی تک منصوبے کو حتمی شکل نہیں دی گئی اور اس کے روٹ سمیت مختلف تفصیلات تبدیل ہوسکتی ہیں۔
مجوزہ پائپ لائن متحدہ عرب امارات کے موجودہ نظام میں مزید اضافہ کرے گی۔ ملک کی پہلی متبادل پائپ لائن 2012 سے فعال ہے، جو ابوظبی کے علاقے حبشان سے فجیرہ تک تقریباً 252 میل طویل ہے۔ اس کی یومیہ گنجائش 15 لاکھ بیرل ہے، جسے بڑھا کر 18 لاکھ بیرل تک کیا جاسکتا ہے۔
یہ بھی پڑھیں: حکومت کا سپر ٹیکس مکمل ختم کرنے پرغور
متحدہ عرب امارات نے رواں سال ایک دوسری ویسٹ ایسٹ پائپ لائن کا بھی اعلان کیا تھا، جس کے 2027 میں فعال ہونے کی توقع ہے۔ اس منصوبے سے فجیرہ کے راستے تیل برآمد کرنے کی صلاحیت دوگنا ہونے کا امکان ہے۔
فجیرہ آبنائے ہرمز سے باہر خلیج عمان کے ساحل پر واقع ہے، جہاں تیل بردار جہاز آبنائے ہرمز سے گزرے بغیر خام تیل لوڈ کرسکتے ہیں۔
تاہم ادنوک کے ترجمان نے بلومبرگ کی رپورٹ کو غیر درست اور محض قیاس آرائی قرار دیا ہے۔
