مکہ مکرمہ ( پاک ترک نیوز)مکہ مکرمہ میں پاکستان، سعودی عرب اور ترکیہ کے درمیان مشترکہ دفاعی معاہدے پر دستخط کر دیے گئے۔ سعودی ولی عہد و وزیرِ اعظم شہزادہ محمد بن سلمان، وزیراعظم محمد شہباز شریف اور ترک صدر رجب طیب اردوان نے معاہدے پر دستخط کیے۔ معاہدے کا مقصد مشترکہ دفاع، علاقائی امن اور اسٹریٹجک تعاون کو مزید مضبوط بنانا ہے۔
اعلامیے کے مطابق مشترکہ دفاعی معاہدہ تاریخی برادرانہ تعلقات اور اسلامی یکجہتی کی بنیاد پر طے پایا۔ معاہدے کے تحت کسی ایک رکن ملک پر مسلح حملہ تینوں ممالک پر حملہ تصور کیا جائے گا، جبکہ ہر قسم کی جارحیت کے خلاف مشترکہ دفاعی حکمتِ عملی اختیار کرنے، دفاعی تعاون، انٹیلی جنس کے تبادلے، فوجی تربیت اور اجتماعی دفاعی صلاحیت بڑھانے پر بھی اتفاق کیا گیا۔
سربراہی اجلاس میں تینوں رہنماؤں نے باہمی تعلقات، علاقائی سلامتی اور مشترکہ مفادات سے متعلق امور پر تفصیلی تبادلۂ خیال کیا۔ رہنماؤں نے خطے میں امن، استحکام اور خوشحالی کے فروغ کے عزم کا اعادہ کرتے ہوئے مکہ مشترکہ دفاعی معاہدے کو اجتماعی سلامتی کے فروغ کی جانب ایک اہم پیش رفت قرار دیا۔
