لاہور( پاک ترک نیوز) برسات کا موسم آتے ہی بازاروں میں نظر آنے والا جامن نہ صرف ذائقے میں منفرد ہوتا ہے بلکہ صحت کے لیے بھی بے شمار فوائد اپنے اندر سموئے ہوئے ہے۔ ماہرین کے مطابق یہ چھوٹا سا پھل غذائیت کا خزانہ ہے جو جسم کے مختلف نظاموں کو بہتر انداز میں کام کرنے میں مدد دے سکتا ہے۔
جامن میں پانی، پروٹین، کاربوہائیڈریٹس، کیلشیئم، آئرن، میگنیشم، فاسفورس، پوٹاشیم، سوڈیم، وٹامن سی، وٹامن بی کمپلیکس اور وٹامن اے سمیت کئی اہم غذائی اجزا پائے جاتے ہیں، جو مجموعی صحت کے لیے مفید سمجھے جاتے ہیں۔
اکثر لوگ جامن کو ذیابیطس کے حوالے سے جانتے ہیں، لیکن اس کے فوائد صرف شوگر تک محدود نہیں۔ جامن میں موجود پوٹاشیم بلڈ پریشر کو متوازن رکھنے میں مدد دیتا ہے، جس سے دل کی صحت بہتر رہ سکتی ہے اور ہائی بلڈ پریشر کے خطرات میں کمی آ سکتی ہے۔
یہ بھی پڑھیں: پھلوں کا بادشاہ آم بھی بحران کا شکار
اس پھل میں موجود آئرن، کیلشیئم اور دیگر معدنیات جسم کے مدافعتی نظام کو مضبوط بنانے میں کردار ادا کرتے ہیں، جبکہ وٹامنز اور اینٹی آکسیڈنٹس بیماریوں کے خلاف جسم کی قدرتی مزاحمت بڑھانے میں مددگار ثابت ہو سکتے ہیں۔
خوبصورتی کے شوقین افراد کے لیے بھی جامن خوشخبری رکھتا ہے۔ ماہرین کے مطابق اس کے استعمال سے جلد کو تروتازگی مل سکتی ہے، جلد ہموار رہتی ہے اور قدرتی چمک میں اضافہ ہو سکتا ہے۔
جامن میں موجود وٹامن سی اور زنک نظامِ تنفس کے لیے بھی فائدہ مند سمجھے جاتے ہیں۔ یہ اجزا کھانسی، نزلہ زکام اور دیگر سانس کی بیماریوں کے خلاف جسم کی مدد کر سکتے ہیں۔
دانتوں اور ہڈیوں کی مضبوطی کے لیے بھی جامن مفید قرار دیا جاتا ہے کیونکہ اس میں کیلشیئم اور فاسفورس وافر مقدار میں موجود ہوتے ہیں۔
اس کے علاوہ جامن میں پائے جانے والے طاقتور اینٹی آکسیڈنٹس اور پولی فینولز جسمانی ورم کم کرنے، خلیات کو نقصان دہ مادوں سے بچانے اور مجموعی صحت بہتر بنانے میں اہم کردار ادا کر سکتے ہیں۔
ماہرین کا کہنا ہے کہ جامن بلڈ شوگر کو متوازن رکھنے، جسم کو ڈی ہائیڈریشن سے بچانے، آئرن کی کمی پوری کرنے اور قبض کے خطرے کو کم کرنے میں بھی مددگار ثابت ہو سکتا ہے۔
تاہم ہر اچھی چیز کی طرح جامن کا استعمال بھی اعتدال میں کرنا چاہیے۔ چونکہ اس میں تیزابیت نسبتاً زیادہ ہوتی ہے، اس لیے بعض افراد زیادہ مقدار میں جامن کھانے کے بعد سینے کی جلن یا معدے کی تکلیف محسوس کر سکتے ہیں۔
تو اگر آپ برسات کے موسم میں جامن کھا رہے ہیں تو جان لیجیے کہ آپ صرف ایک مزیدار پھل ہی نہیں بلکہ صحت کے خزانے سے بھی لطف اندوز ہو رہے ہیں۔
