غزہ : (پاک ترک نیوز)غزہ کی پٹی میں اسرائیلی حملوں کے نتیجے میں کم از کم 23 فلسطینی شہید ہو گئے، جو اکتوبر میں ہونے والی نام نہاد جنگ بندی کے بعد سب سے ہلاکت خیز دنوں میں سے ایک قرار دیا جا رہا ہے۔
طبی ذرائع کے مطابق شہداء میں متعدد بچے بھی شامل ہیں، جن میں ایک 11 سالہ بچی بھی شامل ہے۔
بدھ کے روز غزہ شہر کے طفحہ اور زیتون علاقوں پر اسرائیلی گولہ باری کے نتیجے میں 14 افراد جان سے گئے۔ جنوبی غزہ کے شہر خان یونس کے علاقے قیزان ابو رشوان میں بے گھر افراد کے خیموں پر حملے کے نتیجے میں مزید چار فلسطینی شہید ہوئے۔
اسی طرح المواصی کے ساحلی خیمہ کیمپ پر فضائی حملوں میں دو افراد شہید ہوئے، جن میں فلسطینی ہلالِ احمر کے فرسٹ ریسپانڈر حسین حسن حسین السمَیری بھی شامل ہیں۔ غزہ شہر میں کئی رہائشی مکانات کو کسی پیشگی وارننگ کے بغیر براہِ راست نشانہ بنایا گیا۔
امریکی ثالثی میں طے پانے والی جنگ بندی کے باوجود اسرائیلی فوجی کارروائیوں میں حالیہ گھنٹوں کے دوران نمایاں اضافہ ہوا ہے، جس کے باعث غزہ کے شہری کسی بھی لمحے محفوظ محسوس نہیں کر رہے۔
اسرائیلی فوج نے دعویٰ کیا ہے کہ شمالی غزہ میں ایک ریزرو افسر پر فائرنگ کے بعد اس کے بکتر بند یونٹس اور طیاروں نے حملے کیے۔ فوج کے مطابق یہ واقعہ اسرائیلی کنٹرول میں موجود علاقوں کی نام نہاد "ییلو لائن” کے قریب پیش آیا، تاہم فلسطینی صحافیوں کا کہنا ہے کہ اسرائیل اس لائن کو مسلسل مشرقی غزہ کی جانب آگے بڑھا رہا ہے، جس سے مقامی آبادی میں شدید خوف و بے چینی پھیل گئی ہے۔
رپورٹس کے مطابق جنگ بندی کے نفاذ کے بعد سے اب تک اسرائیلی حملوں میں 520 سے زائد فلسطینی شہید ہو چکے ہیں۔ بدھ کے روز غزہ کی وزارتِ صحت نے بتایا کہ اسرائیل نے 54 فلسطینیوں کی لاشیں اور 66 بکس انسانی اعضا اور باقیات پر مشتمل حوالے کیے، جنہیں بعد ازاں ریڈ کراس کے ذریعے غزہ منتقل کیا گیا۔
وزارتِ صحت کے مطابق 7 اکتوبر 2023 سے اب تک اسرائیلی حملوں میں شہید ہونے والے فلسطینیوں کی تعداد 71 ہزار 803 ہو چکی ہے۔
انسانی حقوق کی تنظیموں اور اقوامِ متحدہ کے تحقیقاتی کمیشن نے غزہ میں اسرائیلی کارروائیوں کو نسل کشی قرار دیا ہے، جبکہ اسرائیل کے خلاف عالمی عدالت انصاف میں نسل کشی کا مقدمہ زیرِ سماعت ہے۔
دوسری جانب فلسطینی ہلالِ احمر نے بتایا کہ رفح کراسنگ کے ذریعے مریضوں کے انخلا کا عمل ایک بار پھر معطل کر دیا گیا تھا، تاہم بعد میں محدود پیمانے پر اجازت دی گئی۔
غزہ کے حکام کے مطابق 18 ہزار سے زائد فلسطینی مریض طبی انخلا کے منتظر ہیں، جن میں 440 انتہائی تشویشناک حالت میں ہیں۔
ادھر اسرائیلی کارروائیاں صرف غزہ تک محدود نہیں رہیں۔ مقبوضہ مغربی کنارے میں شہر یریحو پر اسرائیلی چھاپے کے دوران 24 سالہ فلسطینی نوجوان سعید نائل الشیخ کو فائرنگ کر کے شہید کر دیا گیا، جبکہ متعدد افراد زخمی ہوئے۔
نام نہاد جنگ بندی کے باوجود غزہ میں خونریزی، اسرائیلی حملوں میں ایک دن میں 23 فلسطینی شہید
