اسلام آباد (پاک ترک نیوز )صدرِ مملکت آصف علی زرداری اور وزیراعظم شہباز شریف کے درمیان ایوانِ صدر میں اہم ملاقات ہوئی، جس میں ملک کی مجموعی سیاسی اور سکیورٹی صورتِ حال پر تبادلۂ خیال کیا گیا۔ ذرائع کے مطابق ملاقات میں خیبرپختونخوا میں ایمرجنسی یا گورنر راج کے نفاذ سے متعلق امور پر بھی مشاورت ہوئی، تاہم تاحال کوئی حتمی فیصلہ نہیں کیا گیا۔
ذرائع کے مطابق وزیراعظم شہباز شریف نے صدرِ مملکت کو آج ہونے والے اجلاس اور سیاسی صورتِ حال پر بریفنگ دی۔ وزیراعظم نے مذاکرات ناکام ہونے کی صورت میں حکومتی حکمتِ عملی سے بھی صدر کو آگاہ کیا، جبکہ مولانا فضل الرحمان سے ہونے والے رابطے کی تفصیلات بھی پیش کیں۔
ذرائع کا کہنا ہے کہ صدرِ مملکت اور وزیراعظم نے اتفاق کیا کہ مولانا فضل الرحمان سے ملاقات کے بعد ہی اس معاملے پر کوئی حتمی فیصلہ کیا جائے گا۔
دوسری جانب وزیراعظم شہباز شریف نے وفاقی کابینہ کا غیر معمولی اجلاس کل طلب کر لیا ہے۔ ذرائع کے مطابق اجلاس میں خیبرپختونخوا میں ایمرجنسی یا گورنر راج کے نفاذ سے متعلق تجاویز پر غور اور منظوری دیے جانے کا امکان ہے۔
ذرائع کے مطابق کابینہ سے منظوری کے بعد معاملہ پارلیمنٹ میں پیش کیا جائے گا۔ آئینی تقاضوں کے تحت متعلقہ قرارداد کو دس روز کے اندر پارلیمنٹ کے دونوں ایوانوں سے منظور کرانا ہوگا۔ پارلیمنٹ سے سادہ اکثریت کے ذریعے منظوری کی صورت میں خیبرپختونخوا میں غیر معمولی آئینی اقدامات نافذ کیے جا سکیں گے۔
ملاقات میں نائب وزیراعظم اسحاق ڈار، وزیراعظم کے مشیر برائے سیاسی امور رانا ثناء اللہ، وفاقی وزیر داخلہ محسن نقوی، وزیر قانون اعظم نذیر تارڑ، اٹارنی جنرل منصور عثمان اعوان اور وفاقی وزیر احد چیمہ سمیت دیگر رہنما شریک ہوئے۔
صدرِ مملکت کی معاونت سینیٹر شیری رحمان، سید نوید قمر، سینیٹر سلیم مانڈوی والا اور ڈاکٹر عاصم نے کی۔اجلاس میں یہ اتفاق بھی کیا گیا کہ قومی اسمبلی اور سینیٹ کے الگ الگ اجلاس 13 اکتوبر، بروز منگل، طلب کیے جائیں گے۔
